ព្រៃវែង ÷ តាមការបញ្ជាក់ ពីក្រុមឈ្មួញ និងអាជីវករព្រមទាំង ប្រជាពលរដ្ឋ ដែលដឹកជញ្ជូនស្រូវទៅលក់ឲ្យឈ្មួញយួន តាមច្រកទ្វារអន្តរជាតិបន្ទាយចក្រី ស្រុកព្រះស្តេច បានឲ្យដឹងថា ទល់តែបង់លុយ ទៅឲ្យសមត្ថកិច្ចពាក់ព័ន្ធច្រកនេះ ទើបអ្វីៗ ប្រព្រឹត្តទៅយ៉ាងរលូន ។
រីឯខាងភាគីយួនបានតម្រូវឲ្យឈ្មួញ អាជីវករនិងពលរដ្ឋខ្មែរ ដឹកជញ្ជូនស្រូវឡើងស្ពានទៅទម្លាក់ស្រូវលក់នៅទឹកដីយួន តាមព្រំដែនដែលធ្វើឲ្យ ខាតពេលវេលាយ៉ាងច្រើន ហើយត្រូវបង់លុយ សម្រាប់ខាងសមត្ថកិច្ចភាគីខ្មែរទៀតផង។
ប្រភពពីក្រុមឈ្មួញ ដឹកជញ្ជួនស្រូវយកទៅលក់ឲ្យឈ្មួញវៀតណាម បានឲ្យដឹងទៀតថា ឈ្មួញខែ្មរចំណាយក្នុងមួយជើងៗ អស់ចាប់ពី៣០០០០០រៀល ទៅ ៣៥០០០រៀល ទៅលើសមត្ថកិច្ចពាក់ព័ន្ធច្រកនេះផងដែរ។
ថ្មីៗនេះក្រុមឈ្មួញ អាជីវករនិងប្រជាពលរដ្ឋ ដែលដឹកជញ្ជូនស្រូវទៅលក់ ឲ្យឈ្មួញយួនតាមច្រកទ្វារអន្តរជាតិបន្ទាយចក្រី ស្រុកព្រះស្តេច ខេត្តព្រៃវែង បានអំពាវនាវឲ្យ លោក សួន ម៉ាលីន អភិបាលខេត្តព្រៃវែង ព្រមទាំង លោក ឈឿន ប៊ុន ឆន ស្នងការដ្ឋាននគរបាលខេត្តព្រៃវែងចាត់វិធានការទប់ស្កាត់អំពើពុករលួយ របស់សមត្ថកិច្ចពាក់ព័ន្ធនៅច្រកនេះជាបន្ទាន់។
ទន្ទឹមនឹងនេះក៏មានសេចក្តីអំពាវនាវឲ្យក្រសួងនិងស្ថាប័នពាក់ព័ន្ធពិនិត្យឡើងវិញជាបន្ទាន់ផងដែរ ព្រោះការនាំចេញផលិតផលកសិកម្មទៅលក់នៅក្រៅប្រទេស មិនតម្រូវឲ្យមានការបង់លុយឡើយ។
ប្រភពពីក្រុមឈ្មួញ និងអាជីវករ ព្រមទាំង បប្រជាពលរដ្ឋបាន លើកឡើងថា ថ្មីៗនេះបែរជាមន្ត្រីគយ តម្រូវឲ្យឈ្មួញខ្មែរ បង់លុយក្នុងស្រូវមួយ រថយន្ត ១៥០០០រៀល ទើបអនុញ្ញាតឲ្យឆ្លងកាត់ច្រកព្រំដែនទៅស្រុកយួន ដែលមន្ត្រីគយមិនបានធ្វើអ្វីសោះ បើសរុបទាំងស្ថាប័នផ្សេងៗ គឺស្រូវមួយរថយន្តត្រូវចំណាយអស់ ៣៥០០០រៀលជាការកំណត់។
ហេតុនេះហើយ ទើបក្រុមឈ្មួញ អាជីវករនិងប្រជាពលរដ្ឋដឹកជញ្ជូនស្រូវទៅលក់ ឲ្យឈ្មួញយួនតាមច្រកទ្វារអន្តរជាតិបន្ទាយចក្រី ស្រុកព្រះស្តេច ពួកគាត់មិនសប្បាយចិត្ត ចំពោះប្រធានការិយាល័យគយ ច្រកទ្វារអន្តរជាតិបន្ទាយចក្រីប្រើមន្ត្រីក្រោមឱវាទរបស់ខ្លួន ចាំអង្គុយរាប់ក្បាលឡាន ។
ដូច្នេះហើយទើបមានសេចក្តីអំពាវនាវឲ្យ លោក សួន ម៉ាលីន អភិបាលខេត្តព្រៃវែង ពិនិត្យឡើងវិញ ជាបន្ទាន់ព្រោះអំពើពុករលួយ និងទង្វើមិនប្រក្រតីនៅ ច្រកទ្វារអន្តរជាតិបន្ទាយចក្រី ស្រុកព្រះស្តេច ត្រូវបានលាតត្រដាងជាបន្តបន្ទាប់ ៕
