ត្បូងឃ្មុំ ÷ សេចក្តីរាយការណ៍ពីក្រុមអាជីវករ បញ្ជាក់ឲ្យដឹងថា ចាប់តាំងពីលោក ប៉ែន ស៊ីថា ត្រូវបានតែងតាំងជាប្រធានការិយាល័យគយច្រកទ្វារអន្តរជាតិត្រពាំងផ្លុង ស្រុកពញាក្រែក ខេត្តត្បូងឃ្មុំ រួចមកគឺមន្ត្រីគយរូបនេះ ប្រើតួនាទីនិងអំណាចប្រព្រឹត្តអំពើពុករលួយយ៉ាងពេញទំហឹង មិនអាចបិទបាំងរឿងអាស្រូវបាននោះទេ។
ប្រភពខ្លះបានលើកឡើងថា ដោយសារលោក ប៉ែន ស៊ីថា ចំណាយដើមទុនយ៉ាងច្រើនក្នុងការទទួលបានតំណែងជាប្រធានការិយាល័យគយច្រកទ្វារអន្តរជាតិត្រពាំងផ្លុង ទើបប្រើគ្រប់វិធីដើម្បីប្រមូលលុយតាមរបៀបពុករលួយស្រេចតែអំពើចិត្តរបស់ខ្លួន។
បញ្ហានេះហើយទើបឈ្មួញធំៗជាច្រើននាក់អាចនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់តាមច្រកទ្វារអន្តរជាតិត្រពាំងផ្លុង កកាន់តែច្រើនឡើងៗហើយ លោក ប៉ែន ស៊ីថា តែងប្រើឈ្មោះមន្ត្រីគយធំៗនៅក្នុងអគ្គនាយកដ្ឋានគយនិងរដ្ឋាករកម្ពុជា ដើម្បីបិទបាំងទង្វើរបស់ខ្លួនផ
ងដែរ។
ហេតុនេះហើយទើបក្រោយពេលតែងតាំងជាប្រធានការិយាល័យគយច្រកទ្វារអន្តរជាតិត្រពាំងផ្លុង កាលឆ្នាំ2022 នេះគឺលោក ប៉ែន ស៊ីថា ហ៊ានប្រព្រឹត្តអំពើពុករលួយដោយគ្មានញញើតអ្វីទាំងអស់។
ប្រការនេះហើយទើបមានការអំពាវនាវឲ្យ លោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ចាត់វិធានការទប់ស្កាត់ទង្វើមិនប្រក្រតីរបស់លោក ប៉ែន ស៊ីថា ជាបន្ទាន់ព្រោះអីលោក គុណ ញឹម ដែលជាអគ្គនាយកនៃអគ្គនាយកដ្ឋានគយនិងរដ្ឋាករ ត្រូវបានគេដឹងថាជាអ្នកឃុបឃិតបើកដៃឲ្យលោក ប៉ែន ស៊ីថា ធ្វើអ្វីៗ តាមអំពេីចិត្ត។
មន្ត្រីគយនិងភ្នាក់ងារគយក្នុងខេត្តត្បូងឃ្មុំ បានឲ្យដឹងថា ចាប់តាំងពីលោក ប៉ែន ស៊ីថាទទួលបានតំណែងជាប្រធានការិយាល័យគយច្រកទ្វារអន្តរជាតិត្រពាំងផ្លុង គឺលោក ប៉ែន ស៊ីថា កំពុងឃុបឃិតឲ្យឈ្មួញធំៗបង់ពន្ធតាមរបៀបម៉ៅការហើយឈ្មួញទាំងនោះ អាចនាំចូលទំនិញគេចពន្ធ ទំនិញបង់ពន្ធមិនគ្រប់និងទំនិញខុសច្បាប់កាន់តែច្រើនឡើងៗ អំពើពុករលួយនិងទង្វើមិនប្រក្រតីរបស់លោក ប៉ែន ស៊ីថា មេគយច្រកត្រពាំងផ្លុង កំពុងធ្វើឲ្យរដ្ឋត្រូវខាតបង់ចំណូលពន្ធយ៉ាងច្រើនសន្ធឹកសន្ធាប់ក្នុងមួយខែៗ ហើយមន្ត្រីគយក្រោមឱវាទរបស់លោក ប៉ែន ស៊ីថា អាចគាបសង្កត់ជំរិតយកលុយលើតុក្រោមតុពីក្រុមឈ្មួញតាមអំពើចិត្តរបស់ខ្លួន។
ក្រុមឈ្មួញធំៗ និងអាជីវករតូចតាចក្នុងខេត្តត្បូងឃ្មុំ មានការអំពាវនាវដល់លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ ឲ្យបើកការស៊ើបអង្កេតទៅលើរឿងអាស្រូវពុករលួយ របស់លោក ប៉ែន ស៊ីថា មេគយច្រកទ្វារអន្តរជាតិត្រពាំងផ្លុង ឲ្យបានស៊ីជម្រៅដើម្បីកុំឲ្យមន្ត្រីគយរូបនេះ និងបក្ខពួកឃុបឃិតគ្នាធ្វើអ្វីៗ តាមអំពើចិត្តទៀត៕
