កំពង់ស្ពឺ ÷ ប្រភពពីប្រជាពលរដ្ឋ រស់នៅភូមិសេរីវន ឃុំមហាសាំង ស្រុកភ្នំស្រួច បានបញ្ជាក់ឲ្យ ភ្នាក់ងារសារព័ត៌មានយេីងដឹងថា សព្វថ្ងៃនេះ ក្រុមឈ្មួញមួយក្រុម បានដាក់គ្រឿងចក្រជីករណ្តៅដីបឹងរបស់រដ្ឋ ដែលមានជម្រៅខុសបទដ្ឋានបច្ចេកទេស ហើយរថយន្តដឹកអាចម៍ដីធំៗធ្វើឲ្យជ្រុះអាចម៍ដីពាស់ពេញផ្លូវមិនគ្របតង់ ឲ្យបានត្រឹមត្រូវនោះទេ។
បេីគ្មានការបេីកដៃពីសំណាក់ លោក ប្រធាន មន្ទីររ៉ែ ថាមពលខេត្ត កំពង់ស្ពឺ និង ប្រធានមន្ទីរ ឧតុនិយម ខេត្តកំពង់ស្ពឺទេនោះ គឺឈ្មួញមួយក្រុមមិនអាចដាក់គ្រឿងចក្រជីកដីបឹងយកលក់លេីទីផ្សារសេរី បានឡើយ ។
តាមការលេីកឡេីងស្រដៀងគ្នា ពីលោកពូមេភូមិ និងលោក អ៊ុំអនុភូមិសេីរីវន ឃុំមហាសាំង ស្រុកភ្នំស្រួច បានបញ្ជាក់ច្បាស់ៗថា ដីបឹងនេះ មានទំហំ ៨ ហិត្តាកន្លះ ក្រោមរូបភាពស្ដាបឹងបណ្ដោះទឹក បច្ចុប្បន្នកំពុងសុំច្បាប់ស្នេីទៅថ្នាក់ខេត្ត ហេតុនេះហើយទើបប្រជាពលរដ្ឋក្នុងមូលដ្ឋានជាច្រើនគ្រូសារ ជំរុញឲ្យ ស្ថាប័នពាក់ព័ន្ធមន្ត្រីជំនាញ ព្រមទាំង ប្រធានមន្ទីរបរិស្ថាន ខេត្តកំពង់ស្ពឺ ពិនិត្យឡេីងវិញខ្លះផង កុំឲ្យក្រុមឈ្មួញ ធ្វើអ្វីៗ តាមតែអំពើចិត្ត។
ប្រជាពលរដ្ឋ ភូមិសេរីវន ឃុំមហាសាំង ស្រុកភ្នំស្រួច បានឲ្យដឹងថា រណ្តៅដីបឹងរដ្ឋ ត្រូវបានឈ្មួញមានបក្សពួក ជាច្រើននាក់ កំពុងដឹកជញ្ជូនតាមរថយន្តធំៗយកទៅចាក់លុបដីមានទំហំធំ ជិតបណ្ដោយផ្លូវជាតិលេខ ៤ ធ្វេីឲ្យបងប្អូនពលរដ្ឋ រស់នៅចំណុចភូមិសាស្ត្រនោះ មានការងឿងឆ្ងល់យ៉ាងខ្លាំង ហើយមន្ត្រីជំនាញ និងមន្ត្រីអាជ្ញាធរ ក្នុងមូលដ្ឋាន មិនចាត់វិធវិធានទប់ស្កាត់ទល់តែសោះ។
មជ្ឃដ្ឋានខាងក្រៅ ! និងពលរដ្ឋ ក្នុងភូមិសេរីវន ឃុំមហាសាំង ស្រុកភ្នំស្រួច បានឲ្យដឹងទៀតថា បើគ្មានការបេីកភ្លេីងខៀវ ពីមន្ត្រីពាក់ព័ន្ធក្នុងខេត្តកំពង់ស្ពឺ ទេនោះ គឺឈ្មួញ មិនអាចជីករណ្តៅដីបឹង យ៉ាងធំហើយជ្រៅ និងជ្រុះអាចម៍ដី រប៉ាត់រប៉ាយ លើផ្លូវសាធារណៈយ៉ាងសុខស្រួល រីឯអាជ្ញាធរពាក់ពន្ធ័មានសមត្ថកិច្ច ធ្វើមិនដឹងមិនឬសម្ងំស្ងាត់ឈឹង។
គួររម្លឹកថា ! ផ្លូវនេះបានក្រាលកៅស៊ូ ជាប់ព្រំប្រទល់ ផ្លូវជាតិលេខ ៤ មានប្រវែង ១ គីឡូកន្លះ ដល់ទីតាំងជីករណ្តៅដីបឹង ហេីយផ្លូវនេះជាគម្រោងបដិភាគ របស់មន្ទីរសាសាធារណៈការខេត្តកំពង់ស្ពឺ ដែលបានស្នើសុំថវិកាពី រាជរដ្ឋាភិបាលកម្ពុជា យកមកធ្វេីផ្លូវសម្រាប់ពលរដ្ឋធ្វើសារាចរណ៍ មិនមែនអោយក្រុមឈ្មួញមានអំណាច មកដឹកអាចម៍ដី លើសទម្ងន់អាចបណ្តាលឲ្យ ខូចផ្លូវទាំងស្រុង។
ប្រភពពីប្រជាពលរដ្ឋ រៀបរាប់បន្ថែមទៀតថា យោងតាមច្បាប់អនុញ្ញាតឲ្យធ្វើអាជីវកម្ម ជីករណ្តៅដីបឹង គឺឈ្មួញអាចជីករណ្តៅដីត្រឹមជម្រៅ៥ម៉ែត្រទៅ៦ម៉ែត្រប៉ុណ្ណោះ មិនអាចលើសពីនេះបានឡើយ ប៉ុន្តែឈ្មួញអាចជីករណ្តៅដី នៅក្នុងភូមិសេរីវន ឃុំមហាសាំង ស្រុកភ្នំស្រួចបានយ៉ាងសុខស្រួលបំផុត បែរជាអាជ្ញាធរថ្នាក់ឃុំ ថ្នាក់ស្រុករក្សាភាពស្ងៀមស្ងាត់។
លើសនេះទៅទៀតឈ្មួញ បានប្រើប្រាស់រថយន្តធំៗដឹកអាចម៍ដីពាស់ពេញផ្លូវមិនគ្របតង់ ឲ្យបានត្រឹមត្រូវ ធ្វើឲ្យធ្លាក់អាចម៍ដីរាយប៉ាយក្លាយទៅជាធូលីហ៊ុយសំពោងប៉ះពាល់ដល់ការ រស់នៅរបស់ប្រជាពលរដ្ឋក្នុងមូលដ្ឋាន យ៉ាងពេញបន្ទុក។
ប្រជាពលរដ្ឋ នៅភូមិសេរីវន ឃុំមហាសាំង ស្រុកភ្នំស្រួច អំពាវនាវដល់ថ្នាក់ដឹកខេត្តកំពង់ស្ពឺ ជាពិសេស លោក វី សំណាង អភិបាលខេត្តកំពង់ស្ពឺ ពិនិត្យឡើងវិញជាបន្ទាន់ ចំពោះក្រុមឈ្មួញហ៊ានដាក់គ្រឿងចក្រ ជីកដីបឹងរបស់រដ្ឋដឹកជញ្ជូនយកទៅលក់យ៉ាងគគ្រឹកគគ្រេង ក្នុងមួយថ្ងៃៗ មិនខ្វល់ពីការរិះគន់អ្វីទាំងអស់៕
