ស្វាយរៀង ÷ ប្រភពពីមន្ត្រីនៅច្រកទ្វារអន្តរជាតិព្រំដែនជ្រៃធំបានឲ្យដឹងថា ក្រុមឈ្មួញធំៗ និងអាជីវករក្នុងខេត្តកណ្តាលសម្រុកនាំចូលទំនិញ ពីស្រុកយួនយ៉ាងពេញបន្ទុក ដូចជា ត្រី បន្លែផ្លែឈើ មី ទឹកស្ទីង និងគ្រឿងកំប៉ុងគ្រប់មុខ ព្រមទាំងទំនិញជាច្រើនប្រភេទទៀត ហើយសមត្ថកិច្ចពាក់ព័ន្ធ ច្រកអន្តរជាតិ ជ្រៃធំ អាចប្រមូលលុយ បានយ៉ាងច្រើនសន្ធឹកសន្ធាប់ ជារៀងរាល់ថ្ងៃ។
ការដែលលោក ប្រធានការិយាល័យគយ ច្រកទ្វារអន្តរជាតិព្រំដែនជ្រៃធំ ដែលមានខ្នងបង្អែករឹងមាំនៅពីក្រោយ ហេតុនេះលោក ឈឿន សុចិត្រ ស្នងការនគរបាលខេត្តកណ្ដាល និងលោក គង់ សោភ័ណ្ឌ អភិបាលខេត្តកណ្តាល គួរតែពិនិត្យឡើងវិញខ្លះផង ព្រោះអំពើពុករលួយ របស់សមត្ថកិច្ចច្រកទ្វារអន្តរជាតិជ្រៃធំ ត្រូវបានលាតត្រដាង ជាបន្តបន្ទាប់រួចទៅហើយ។
ក្រុមឈ្មួញតូច ធំ មកពីខេត្តនានា ដែលនាំទំនិញគ្រប់ប្រភេទចេញពីស្រុកយួន ចូលតាមច្រកទ្វារអន្តរជាតិព្រំដែនជ្រៃធំ ស្រុកជ្រៃធំ បានឲ្យដឹងថា បច្ចុប្បន្ននេះមេប៉ុស្ដិ៍នគរបាលច្រកទ្វារអន្តរជាតិជ្រៃធំ នៅតែបើកដៃឲ្យឈ្មួញនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់ យ៉ាងគគ្រឹកគគ្រេង គ្មានការទប់ស្កាត់នោះទេ។
ប្រភពបានឲ្យដឹងទៀតថា ការដែលមេបប៉ុស្តិ៍អន្តោប្រវេសន៍ច្រកទ្វារអន្តរជាតិជ្រៃធំ ហ៊ានធ្វើអ្វីៗ តាមអំពើចិត្ត គឺដោយ
សារអាងមានខ្នងបង្អែករឹងមាំនៅក្នុងស្នងការដ្ឋាននគរបាលខេត្តកណ្ដាល ហើយលោក ឈឿន សុចិត្រ ស្នងការដ្ឋាននគរបាលខេត្តកណ្តាល តែងតែរក្សាភាពស្ងៀមស្ងាត់។
ដូច្នេះហើយទើប មេប៉ុស្តិ៍អន្តរជាតិជ្រៃធំ អាចប្រើអំណាច និងតួនាទី របស់ខ្លួនប្រមូលលុយ តាមរបៀបពុករលួយកាន់តែខ្លាំងឡើងៗ តាំងពីអំឡុងដេីមខែមេសា ឆ្នាំ២០២៣ រហូតមកដល់បច្ចុប្បន្ននេះ។
តាមការបង្ហើបពីក្រុមឈ្មួញនិង អាជីវករដែលនាំចូលទំនិញច្រើនប្រភេទ ពីស្រុកយួន តាមច្រកទ្វារអន្តរជាតិព្រំដែនជ្រៃធំ ខេត្តកណ្តាល បានឲ្យដឹងថា មុខរបរ របស់ពួកគាត់សព្វថ្ងៃនេះ នៅសល់កម្រៃតិចតួចណាស់ ។
ដោយហេតុថា មេគយច្រកទ្វារអន្តរជាតិព្រំដែនជ្រៃធំ គាបយកលុយច្រើនពេក ដោយគ្មានចេញបង្កាន់ដៃបង់លុយ ឬវិក្ក័យបត្រ ត្រឹមត្រូវនោះទេ ហើយគ្មានឈ្មួញ និងអាជីវករ ណាហ៊ានតវ៉ាឡើយ។
ទន្ទឹមនឹងនេះក្រុមឈ្មួញ ដឹកជញ្ជនទំនិញចេញពីស្រុកយួនតាមច្រកទ្វារអន្តរជាតិព្រំដែនជ្រៃធំ ត្រូវបង់លុយឲ្យមន្ត្រីគយ និងសមត្ថកិច្ចពាក់ព័ន្ធជាច្រើនស្ថាប័នទៀតទាំងនៅច្រកព្រំដែន និងនៅតាមផ្លូវ ធ្វើឲ្យមុខរបរ រកទទួលទានប្រឈមនឹងបញ្ហាលំបាកកាន់តែខ្លាំងឡើងៗ៕
