មណ្ឌលគីរី ÷ មន្ត្រីអង្គការក្រៅរដ្ឋាភិបាលដែលឃ្លាំមើលបទល្មើសព្រៃឈើក្នុងខេត្តមណ្ឌលគិរី បានឲ្យដឹងថា ព្រៃឈើនៅតំបន់ដែនជម្រកសត្វព្រៃកែវសីមា ស្រុកកែវសីមា និងនៅតំបន់ដែនជម្រកសត្វព្រៃភ្នំព្រេច ស្រុកពេជ្រដា ខេត្តមណ្ឌលគិរី កំពុងរងការបំផ្លាញយ៉ាងមហន្តរាយ។
ប្រភពបានឲ្យដឹងទៀតថា មន្ត្រីបរិស្ថាន មន្ត្រីរដ្ឋបាលព្រៃឈើ សមត្ថកិច្ចអាវុធហត្ថ សមត្ថកិច្ចនគរបាល និងមន្ត្រីយោធា មានជាប់ពាក់ព័ន្ធទៅនឹងសកម្មភាពបំផ្លាញព្រៃឈើយ៉ាងរាលដាលនៅស្រុកកែវសីមា និងស្រុកពេជ្រដា។
ក្នុងនោះមានឈ្មួញ2នាក់ឈ្មោះ តាក់ និងឈ្មោះ ផេន ដឹកជញ្ជូនឈើពីស្រុកកែវសីមា និងស្រុកពេជ្រដា ខេត្តមណ្ឌលគិរី ចូលទៅស្រុកចិត្របុរី ខេត្តក្រចេះ យ៉ាងរលូន ព្រោះគ្មានមន្ត្រីជំនាញ ឬសមត្ថកិច្ចណាបង្ក្រាបឡើយ។
ប្រជាពលរដ្ឋនៅក្នុងស្រុកកែវសីមា និងស្រុកពេជ្រដា ខេត្តមណ្ឌលគិរី បានអំពាវនាវឲ្យលោក ថង សាវុន អភិបាលខេត្តមណ្ឌលគិរី និងលោក ហែម បូណារ៉ែល មេបញ្ជាការកងរាជអាវុធហត្ថខេត្តមណ្ឌលគិរី ព្រមទាំងលោក ឡោ សុខា ស្នងការនគរបាលខេត្តមណ្ឌលគិរី ចាត់វិធានការបង្ក្រាបបទល្មើសព្រៃឈើជាបន្ទាន់។
ដោយហេតុថាបច្ចុប្បន្នឈ្មួញឈ្មោះ តាក់ រស់នៅភូមិទួល ចំណុះឲ្យភូមិច្រវាក្រោម ឃុំកន្ទួត ស្រុកចិត្របុរី និងឈ្មួញឈ្មោះ ផេន រស់នៅភូមិសិរីសុខា ឃុំថ្មអណ្ដើក ស្រុកចិត្របុរី ដឹកជញ្ជូនឈើពីខេត្តមណ្ឌលគិរី ចូលស្រុកចិត្របុរី តាមអំពើចិត្ត។
មន្ត្រីជំនាញ និងសមត្ថកិច្ចពាក់ព័ន្ធក្នុងស្រុកកែវសីមា ស្រុកពេជ្រដា មិនបង្ក្រាបឈ្មួញឈ្មោះ តាក់ និងឈ្មួញឈ្មោះ ផេន នោះទេ ព្រោះខ្លាចបាត់បង់ផលប្រយោជន៍របស់ពួកគេ។
ប្រភពស្និទ្ធនឹងឈ្មួញឈ្មោះ តាក់ ឈ្មួញឈ្មោះ ផេន បានឲ្យដឹងថា ឈ្មួញទាំង2នាក់នេះអាចដឹកជញ្ជូនឈើអារប្រភេទលេខ2 ចេញពីស្រុកកែវសីមា និងស្រុកពេជ្រដា ខេត្តមណ្ឌលគិរី ចូលដល់ស្រុកចិត្របុរី ខេត្តក្រចេះ យ៉ាងរលូនគឺមានការឃុបឃិតជាប្រព័ន្ធ។
ដូច្នេះលោក ថង សាវុន អភិបាលខេត្តមណ្ឌលគិរី ក៏ដូចជាលោក ហែម បូណារ៉ែល មេបញ្ជាការកងរាជអាវុធហត្ថខេត្តមណ្ឌលគិរី និងលោក ឡោ សុខា ស្នងការនគរបាលខេត្តមណ្ឌលគិរី មិនគួរបណ្ដែតបណ្ដោយតទៅទៀតនោះទេ។
ប្រសិនបើមិនចាត់វិធានការទប់ស្កាត់ឲ្យបានទាន់ពេលវេលាទេនោះគឺព្រៃឈើដែលនៅសេសសល់ក្នុងស្រុកកែវសីមា និងស្រុកពេជ្រដា ខេត្តមណ្ឌលគិរី ត្រូវរលាយសាបសូន្យក្នុងពេលឆាប់ៗខាងមុខចៀសមិនផុតឡើយ៕
