ស្វាយរៀង ÷ ប្រភពពីប្រជាពលរដ្ឋ រស់នៅភូមិស្រែវាល ឃុំបុសមន ស្រុករំដួល បានឲ្យដឹងថា ប្រធានការិយាល័យគយច្រកទ្វារព្រំដែនតំបន់បុសមន ទេីបឡេីងកាន់តំណែងថ្មី រួមដៃគ្នាជាមួយមេគយចល័តផ្ទៃប្រទេស កំពុងត្រូវប៉ាន់គាបយកលុយ ដាក់ហោប៉ៅយ៉ាងត្រជាក់ចិត្ត ពីក្រុមឈ្មួញដឹកទំនិញ ក្នុងខេត្តស្វាយរៀង ក៏ដូចជាឈ្មួញតូចធំ មកពីបណ្តាលខេត្តនានា កំពុងសម្រុកដឹកទំនិញគ្រប់ប្រភេទ ចេញពីស្រុកយួនទាំងយប់ទាំងថ្ងៃ តាមរថយន្តធំៗនិងរថយន្តសាន់យ៉ុង រម៉កសន្តោងវែង យ៉ាងពេញបន្ទុក ជាប្រភពចំណូល របស់សមត្ថកិច្ចនគរបាលនិងមេគយច្រកនេះ។
ហេតុនេះ លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ មិនគួរបណ្តែតបណ្តោយតទៅទៀតនោះទេ លោក គុណ ញឹម អគ្គនាយក រដ្ឋករ គយកម្ពុជា ពិនិត្យឡើងវិញខ្លះផង កុំឲ្យបុគ្គល មេគយច្រកទ្វារព្រំដែនបុសមន ប្រេីចៃគយចាំអង្គុយយកលុយ ពីក្រុមឈ្មួញដឹកទំនិញ គ្មានចេញវិក័យប័ត្រឲ្យឡេីយ។
ប្រភពពីមន្ត្រីពាក់ព័ន្ធនៅច្រកទ្វារព្រំដែនតំបន់បុសមន បានឲ្យដឹងទៀតថា ឈ្មួញធំៗ ដឹកទំនិញគ្រប់ប្រភេទ ចេញពីស្រុកយួន ចូលមកខ្មែរ ដូចជាឈ្មួញដ៏ទៃទៀតមកពីបណ្តាលខេត្តផ្សេងៗ សម្រុកដឹកទំនិញតាមច្រកនេះ បានក្លាយទៅជាប្រភពចំណូលដ៏សំខាន់ របស់ មេគយចល័ត បក្ខពួកបែងចែកផលប្រយោជន៍គ្នាធ្វើមានបាន មិនខ្វល់ពីការរិះគន់អ្វីទាំងអស់។
ទន្ទឹមនឹងនេះឈ្មួញតូចតាច ក្នុងខេត្តស្វាយរៀងនិងឈ្មួញដ៏ទៃទៀតមកពីខេត្តផ្សេងៗ ដឹកទំនិញគេចពន្ធបង់ពន្ធមិនគ្រប់ចេញពីស្រុកយួនដូចជា÷ផ្លែដូង ផ្លែឈើ ពូក តុជ័រ ធុងជ័រកៅអីជ័រ ដែកលួស កូនរទេះ មី ទឹកស្ទីង នឹងគ្រឿងកុំប៉ុងគ្រប់មុខត្អូញត្អែរ ប្រាប់ភ្នាក់ងារព័ត៌មាន យេីងឲ្យដឹងថា ពួកគាត់រកស៊ីសព្វថ្ងៃបានត្រឹមចិញ្ចិម គយចល័តនិង មេគយប្រចាំច្រកទ្វារព្រំដែនបុសមន កំណត់យកលុយ ថ្លៃបាយទឹក ក្នុងមួយរថយន្ដធំចាប់ពី៦០ម៉ឺនរៀល ទៅ៧០ម៉ឺនរៀលជាកំហិត រីឯរថយន្តតូចនឹងរម៉កសន្តោងវែងៗ បង់ចាប់២០ម៉ឺនរៀលទៅ៣០ម៉ឺនរៀលជាថ្នូរ មិនបង្ក្រាប ។
ដូច្នេះហើយលោក គុណ ញឹម អគ្គរដ្ឋករ គយកម្ពុជា និងលោក អូន ព័ន្ធ មុន្នីរ័ត្ន រដ្ឋមន្ត្រីក្រសួងសេដ្ឋកិច្ចហិរញ្ញវត្ថុ ពិនិត្យឡើងវិញខ្លះផង ចំពោះ មេគយច្រកទ្វារព្រំដែនតំបន់បុសមន ទេីបឡេីងកាន់តំណែងថ្មី និងសមត្ថកិច្ចពាក់ព័ន្ធច្រើនស្ថាប័នអង្គុយចាំយកលុយ មិនចេញវិក័យប័ត្រឲ្យ ត្រូវបានលាតត្រដាង រិះគន់ពីសំណាក់ក្រុមឈ្មួញដឹកទំនិញ អះអាងចំៗថា ធ្វើឲ្យរដ្ឋត្រូវខាតបង់ចំណូលពន្ធយ៉ាងច្រើនសន្ធឹកសន្ធាប់ក្នុងមួយខែ! ៕
