ប្រភពពីមន្ត្រីគយនិងភ្នាក់ងារ គយចល័តតំបន់១ បានឲ្យដឹងថា ចាប់តាំងពីលោក អ៊ួន សុវណ្ណារ៉ា ទទួលបាន តំណែងជាប្រធានគយចល័តតំបន់១ គឺលោក អ៊ួន សុវណ្ណារ៉ា កំពុងឃុបឃិតឲ្យឈ្មួញធំៗ បង់ពន្ធតាមរបៀបម៉ៅការហើយឈ្មួញទាំងនោះអាចនាំចូលទំនិញគេចពន្ធ ទំនិញបង់ពន្ធមិនគ្រប់និងទំនិញ ខុសច្បាប់កាន់តែច្រើនឡើងៗគ្រប់បណ្ដាខេត្តនានាចូលក្នុងទីក្រុងភ្នំពេញ។
ឈ្មួញតូច ធំ ដឹកជញ្ជូនទំនិញពីស្រុកយួន ឆ្លងកាត់ច្រកទ្វារអន្តរជាតិព្រំដែនត្រពាំងផ្លុង និងច្រកទ្វារអន្តរជាតិព្រំដែនមុឺនជ័យ ជាពិសេសមកពីច្រកទ្វារអន្តរជាតិព្រំដែនបាវិត តាមបណ្តោយផ្លូវជាតិលេខ១ ព្រមទាំងច្រកផ្សេងៗទៀត មានរថយន្តធំ ៗដឹកទំនិញពីគ្រប់បណ្ដាខេត្ត ចូលមកទីក្រុងភ្នំពេញក្នុងមួយថ្ងៃៗមិនក្រោមពី 500 គ្រឿងទៅ100គ្រឿងនោះទេ ហើយឡានដឹកទំនិញទាំងនេះត្រូវបង់ឲ្យ មេគយចល័តតំបន់១ក្នុងរថយន្តនីមួយៗបង់ចន្លោះពី 100 ដុល្លារទៅ 400 ដុល្លារឲ្យទៅមេគយចល័តតំបន់១ ទើបចូលទីក្រុងភ្នំពេញបានដោយសុវត្ថិភាព ។
អំពើពុករលួយនិងទង្វើមិនប្រក្រតីរបស់លោក អ៊ួន សុវណ្ណារ៉ា មេគយ គយចល័តតំបន់មួយកំពុងធ្វើឲ្យរដ្ឋត្រូវខាតបង់ចំណូលពន្ធយ៉ាងច្រើនសន្ធឹកសន្ធាប់ក្នុងមួយខែៗ ហើយមន្ត្រីគយក្រោមឱវាទរបស់លោក អ៊ួន សុវណ្ណារ៉ា អាចគាបសង្កត់ជំរិតយកលុយលើតុក្រោមតុពីក្រុមឈ្មួញតាមអំពើចិត្តរបស់ខ្លួន ។
បញ្ហានេះហើយទើប មានការអំពាវនាវដល់លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ ឲ្យបើកការស៊ើបអង្កេតទៅលើរឿងអាស្រូវពុករលួយរបស់លោក អ៊ួន សុវណ្ណារ៉ា មេគយចល័តតំបន់១ ឲ្យបានស៊ីជម្រៅដើម្បីកុំឲ្យមន្ត្រីគយរូបនេះនិងបក្ខពួកឃុបឃិតគ្នាធ្វើអ្វីៗ តាមទំនេីងចិត្តទៀត។
ប្រភពពីមន្ត្រីគយនិងភ្នាក់ងារគយចល័តតំបន់១ បានឲ្យដឹងទៀតថា ចាប់តាំងពីលោក អ៊ួន សុវណ្ណារ៉ា ត្រូវបានតែងតាំងជាប្រធានគយចល័តតំបន់១ រួចមកគឺមន្ត្រីគយរូបនេះប្រើតួនាទីនិងអំណាចប្រព្រឹត្តអំពើពុករលួយយ៉ាងពេញបន្ទុក ដោយគ្មានញញើតអ្វីទាំងអស់។
ប្រភពខ្លះបានលើកឡើងថា ដោយសារលោក អ៊ួន សុវណ្ណារ៉ា ចំណាយដើមទុនយ៉ាងច្រើនក្នុងការទទួលបានតំណែងជាប្រធានគយចល័តតំបន់មួយ ទើបប្រើគ្រប់វិធីដើម្បីប្រមូលលុយតាមរបៀបពុករលួយ ស្រេចតែអំពើចិត្តរបស់ខ្លួន។
ក្រុមឈ្មួញ ក៍ដូចជាអាជីវករ នាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់ មកពីបណ្ដាលខេត្តនានា ចូលមកទីក្រុងភ្នំពេញ កាន់តែច្រើនឡើងៗហើយលោក អួ៊ន សុវណ្ណារ៉ា តែងប្រើឈ្មោះមន្ត្រីគយធំៗនៅក្នុងអគ្គនាយកដ្ឋានគយនិងរដ្ឋាករកម្ពុជា ដើម្បីបិទបាំងទង្វើរបស់ខ្លួនផងដែរ។
តាមមន្ត្រីគយដែលស្និទ្ធនឹងលោក អ៊ួន សុវណ្ណារ៉ា បានឲ្យដឹងថា ចាប់តាំងពីទទួលតំណែងគយចល័តតំបន់១មក លោក អ៊ួន សុវណ្ណារ៉ា ល្បីល្បាញខាងប្រើតួនាទីនិងអំណាចប្រមូលលុយតាមរបៀបពុករលួយយ៉ាងពេពេញបន្ទុក គ្មានពួកឈ្មួញណាម្នាក់អាចតវ៉ាបានឡើយ។
ហេតុនេះហើយទើបមានការអំពាវនាវឲ្យលោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ចាត់វិធានការទប់ស្កាត់ទង្វើមិនប្រក្រតីរបស់ លោក អ៊ួន សុវណ្ណារ៉ា ជាបន្ទាន់ ព្រោះអីលោក គុណ ញឹម អគ្គនាយកនៃអគ្គនាយកដ្ឋានគយនិងរដ្ឋាករ ត្រូវបានគេដឹងថា ជាអ្នកឃុបឃិតបើកដៃឲ្យលោក អ៊ួន សុវណ្ណារ៉ា ធ្វើអ្វីៗស្រេចតែចិត្ត ៕
