ក្រចេះ ÷ ប្រជាពលរដ្ឋបានឲ្យដឹងថាប្រទះឃើញគោយន្តកន្ត្រៃប្រមាណជិត២០០គ្រឿង សម្រុកចូលទៅក្នុងដែនជម្រកសត្វព្រៃឡង់ ចូលទៅដឹកឈើលក់អោយក្រុមហ៊ុន ស៊ីង បាយអូថេក ក្នុងភូមិសាស្ត្រឃុំកំពង់ចាម ស្រុកសំបូរ ខេត្តក្រចេះ។
ជាក់ស្តែង សកម្មភាពឧក្រិដ្ឋកម្មកាប់បំផ្លាញព្រៃឈើយ៉ាងរង្គាល ស្ថិតតំបន់ការពារដែនជម្រកសត្វ ព្រៃឡង់ កំពុងរងការគំរាមកំហែងពីសំណាក់ក្រុមឈ្មួញទុចរិតរកបទល្មើសព្រៃឈើដោយខុសច្បាប់ដឹកចូលក្រុមហ៊ុន ស៊ីង បាយអូថេក Think-Biotech;Co.ltd ករណីកាប់បំផ្លាញព្រៃឈើយ៉ាងគំហុកបែបនេះ ត្រូវបានគេសង្ស័យថាមានការឃុបឃិតជាបណ្តាញជាមន្ត្រីអនុរក្សបរិស្ថាន ដែលមានភារកិច្ចគ្រប់គ្រង និងការពារតំបន់ព្រៃឡង់នេះតែម្តង។
ប្រជាពលរដ្ឋរស់នៅក្នុង ភូមិសាស្ត្រនោះបានបន្តថា នៅថ្ងៃទី២៥ ខែមេសា ឆ្នាំ២០២៣នេះ គេបានសង្កេតឃើញសកម្មភាពនៃការកាប់អាឈើចេញពីក្នុងព្រៃក្បែរស្នាក់ការបរបរិស្ថានត្រពាំងសង្កែ កើតមានយ៉ាងអាណាធិបតេយ្យ ដែលស្ថិតក្រោមការគ្រប់គ្រងរបស់លោក សាំង សុខន នាយកដែនជំរកសត្វព្រៃឡង់។
មិនតែប៉ុណ្ណោះក្រុមឈ្មួញបានគៀងគរប្រជាពលរដ្ឋឲ្យចូលកាប់ប្រភេទឈើឈ្លិក ចំណុចទីតាំងមួយចំនួនដូចជា(អូរកំបោរ ,កំបោរជ្រោង ,ចែម៉ែ ,ត្រពាំងទា និងត្រពាំងសង្កែរ ភូមិសាស្ត្រទាំងនេះ ស្ថិតទល់មុខស្នាក់ការបរិស្ថានត្រពាំងសង្កែរ ប្រហែលជា១គីឡូម៉ែត្រប៉ុណ្ណោះ ក្នុងស្រុកសំបូរ ខេត្តក្រចេះ។
ប្រជាសហគមន៍ការពារព្រៃឡង់បានប្រាប់ឱ្យដឹងថា ពួកគាត់បានសង្កេតឃើញមានជំរុំជាច្រើនត្រូវបោះក្នុងតំបន់អូរកំបោរ ដែលនៅមិនឆ្ងាយពីស្នាក់ការរបស់មន្ត្រីបរិស្ថានដែនជម្រកព្រៃឡង់ ដោយពួកគេធ្វើសកម្មភាពអារផ្តូលរំលំដើមឈើធំពុះជ្រាកជាជ្រុងរួចដឹកតាមគោយន្តកន្ត្រៃ ឬគោយន្តកែឆ្នៃផ្សេងទៀត ចូលទៅលក់ឱ្យក្រុមហ៊ុន ស៊ីង បាយអូថេក ដោយគ្មានច្បាប់អនុញាត្ត ហើយមន្ត្រីបរិស្ថានទាំងនេះគ្មានការទប់ស្កាត់ឡើយ។
មជ្ឈដ្ឋានខាងក្រៅ .!និងពលរដ្ឋនៅតំបន់នោះបានអំពាវនាវ ដល់អាជ្ញាធរគ្រប់លំដាប់ថ្នាក់ជាពិសេសមន្ត្រីជាន់ខ្ពស់ថ្នាក់ជាតិក្រសួងពាក់ព័ន្ធមេត្តាជួយអន្តរាគមន៍ទប់ស្កាត់បទល្មើសកាប់បំផ្លាញព្រៃឈើក្នុងតំបន់ព្រៃឡង់នេះផង បើពុំដូច្នេះទេ ព្រៃឡង់ នឹងត្រូវរលាហិនហោចអស់ជាក់ជាមិនខានឡើយ។
សកម្មជនការពារព្រៃឈើ បានឲ្យដឹងទៀតថា ក្រុមហ៊ុន ស៊ីង បាយអូថេក ដែលមានទីតាំងជាប់ព្រំប្រទល់ ជាមួយតំបន់ព្រៃឡង់ កំពុងតែមមាញឹកក្នុងការដឹកជញ្ជូនឈើចេញព្រៃការពារចូលទៅក្នុងក្រុមហ៊ុនរបស់ ខ្លួន ដោយកែនប្រជាពលរដ្ឋនៅតំបន់នោះចូលទៅកាប់ឈើ នៅក្នុងព្រៃអភិរក្សយកមកលក់ឲ្យខ្លួនក្នុង មួយ ម៉ែត្រគូប ៤០ទៅ៥០ម៉ឺនរៀល។
ចំណែកក្រុមហ៊ុន ស៊ីង បាយអូថេកនេះ បានលក់ឈើបន្តឱ្យក្រុមហ៊ុន អង្គរផ្លាយវូត ដែលជាក្រុមហ៊ុនធំនាំឈើចេញទៅលក់នៅក្រៅប្រទេស។
សកម្មជនការពារព្រៃឈើ បាននិយាយថា នៅថ្ងៃទី២៤ ខែមេសា ឆ្នាំ២០២៣ នេះ ឃើញមានសកម្មភាពឧក្រិដ្ឋកម្មកាប់បំផ្លាញព្រៃមុខកាត់ធំៗ នៅក្នុងតំបន់ដែនជម្រកសត្វព្រៃឡង់ ពិសេសគឺនៅក្បែរស្នាក់ការបរិស្ថានត្រពាំងសង្កែរ មានសំឡេងរណាយន្តបំពង ទ្រហឹងពេញព្រៃ ប៉ុន្តែលោក សាំង សុខន នាយកដែនជំរកសត្វព្រៃឡង់ ឆ្លើយតបយ៉ាងខ្លីប្រាប់ថា លោកមិនបានដឹងអំពីសកម្មភាពការកាត់ឈើលក់នៅចំណុចទាំងប៉ុន្មាននោះឡើយ លោកថាចាំឱ្យកូនចៅទៅត្រួតពិនិត្យ។
បន្ទាប់ពីមានការកាប់បំផ្លិចបំផ្លាញព្រៃឈើ ក្នុងតំបន់ការពារព្រៃឡង់នេះ ក៍មានសេចក្តីរាយការទៅកម្លាំងសមត្ថកិច្ចគ្រានោះ សមត្ថកិច្ចក៏ឆ្មក់ចាប់គោយន្តកន្ត្រៃបានចំនូន១៥គ្រឿង ដែលកំពុងដឹងឈើទៅលក់ឲ្យក្រុមហ៊ុន ស៊ីង បាយអូថេក ។
ប្រជាសហគមន៍ និងសង្គមសុីវិលបានអោយឲ្យដឹងថា ចំពោះមន្ត្រីបរិស្ថានដែលប្រចាំការពារនៅក្នុងដែនជម្រកសត្វព្រៃ ព្រៃឡង់ ហាក់មានការតឹងរឹងចំពោះប្រជាពលរដ្ឋធម្មតានិងមិនឱ្យមានការចូលកាប់ឈើ ឬកាប់ឆ្ការវៀតយកដីធ្លីរបស់រដ្ឋ នោះទេ តែចំណែកឈ្មួញឈើធំៗដែលមានឥទ្ធិពល និងមានលុយអាចចូលកាប់ទន្ទ្រានដីព្រៃរបស់រដ្ឋរាប់រយហិចតាយកជាកមកម្មសិទ្ធ៕
