មន្ត្រីនៅច្រកអន្តរជាតិម៉ឺនជ័យ ស្រុកកំចាយមារ ខេត្តព្រៃវែង បានបង្ហើបឲ្យដឹងថា ករណីឈ្មួញអាចដឹកជញ្ជូនធ្យូងចេញទៅស្រុកយួនយ៉ាងពេញបន្ទុក មួយរយៈកន្លងទៅនេះគឺមានការបើកដៃពីសំណាក់លោក វ៉ាន់ ពិសិដ្ឋ នាយប៉ុស្តិ៍នគរបាលអន្តោប្រវេសន៍ច្រកទ្វារអន្តរជាតិម៉ឺនជ័យតែម្ដង។
ជាពិសេសនោះ លោក វ៉ាន់ ពិសិដ្ឋ មេប៉ុស្តិ៍នគរបាលច្រកទ្វារអន្តរជាតិមុឺនជ័យ ជាអ្នកមានសិទ្ធិអំណាច បេីកបារ៉ាស់ឲ្យក្រុមឈ្មួញដឹកជញ្ជូនធ្យូងចេញទៅស្រុកយួន យ៉ាងគំហុករាល់យប់ ហើយក៏មានកិច្ចសហការពីសំណាក់ ប្រធានការិយាល័យគយច្រកទ្វារអន្តរជាតិម៉ឺនជ័យ ផងដែរ។
ដោយសារមានកិច្ចសហការជាប្រព័ន្ធបែបនេះហើយ ទើបឈ្មួញអាចដឹកជញ្ជូនធ្យូងពីខេត្តក្រចេះ ឆ្លងកាត់ខេត្តត្បូងឃ្មុំ រួចនាំចេញទៅស្រុកយួនយ៉ាងរលូន ព្រោះសមត្ថកិច្ចនៅច្រកទ្វារអន្តរជាតិម៉ឺនជ័យ គិតតែពីរឿងប្រមូលលុយ។
តាមប្រភពពីមន្ត្រីនៅច្រកអន្តរជាតិម៉ឺនជ័យ បានឲ្យដឹងទៀតថា បច្ចុប្បន្នឈ្មួញទាំងតូចទាំងធំ អាចនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់ដោយសេរី ព្រោះអីមានការបើកដៃពីលោក ប្រធានការិយាល័យគយច្រកម៉ឺនជ័យ។
ប្រសិនបើគ្មានការបើកដៃពីលោក ប្រធានការិយាល័យគយច្រកម៉ឺនជ័យ ទេនោះ ឈ្មួញមិនអាចនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់ពីស្រុកយួនស្រេចតែអំពើចិត្តបានទេ។
ការដែលលោក វ៉ាន់ ពិសិដ្ឋ នាយប៉ុស្តិ៍នគរបាលអន្តោប្រវេសន៍ច្រកទ្វារអន្តរជាតិម៉ឺនជ័យ ហ៊ានប្រព្រឹត្តអំពេីពុករលួយដុះស្លែ ច្រើនខែឆ្នាំយូរណាស់មកហេីយ ព្រោះមានអាងខ្នងបង្អែករឹងមាំ នៅក្រសួងមហាផ្ទៃ ចាំជួយបិទបាំងរឿងអាស្រូវរបស់ខ្លួន។
តាមការបញ្ជាក់ពីក្រុមឈ្មួញដឹកជញ្ជូនធ្យូងចេញទៅស្រុកយួនបានឲ្យដឹងថា អាជីវកម្មរបស់ពួកគេនៅសល់កម្រៃតិចតួចប៉ុណ្ណោះ ទុកទិញអង្ករច្រកឆ្នាំង ព្រោះសមត្ថកិច្ចពាក់ពន្ធ័នៅច្រកទ្វារអន្តរជាតិម៉ឺនជ័យ គាបយកលុយច្រើនពេក។
រីឯក្រុមឈ្មួញទាំងធំទាំងតូច ដែលនាំចូលទំនិញពីស្រុកយួន តាមច្រកទ្វារអន្តរជាតិម៉ឺនជ័យ បានត្អូញត្អែរថា មុខរបរកស៊ីរបស់ពួកគេជួបផលលំបាកកាន់តែខ្លាំង ព្រោះមន្ត្រីគយ និងសមត្ថកិច្ចនៅច្រកទ្វារព្រំដែនគាបយកលុយលើតុក្រោមតុ ស្រេចតែអំពើចិត្ត។
ហេតុនេះថ្នាក់ដឹកនាំក្រសួងពាក់ព័ន្ធមិនគួរបណ្ដែតបណ្ដោយតទៅទៀតនោះទេ ព្រោះអីអំពើពុករលួយ របស់សមត្ថកិច្ចនៅច្រកទ្វារអន្តរជាតិម៉ឺនជ័យ ត្រូវបានលាតត្រដាងជាបន្តបន្ទាប់រួចមកហើយ៕
