ស្វាយរៀង ÷ ប្រភពពីប្រជាពលរដ្ឋ រស់នៅភូមិស្រែវាល ឃុំបុសមន ស្រុករំដួល បានឲ្យដឹងថា មេគយចល័តច្រកទ្វារព្រំដែនបុសមន កំពុងត្រូវប៉ាន់ប្រមូលលុយ ដាក់ហោប៉ៅយ៉ាងត្រជាក់ចិត្ត ពីក្រុមឈ្មួញដឹកទំនិញ ក្នុងខេត្តស្វាយរៀង ក៏ដូចជាឈ្មួញតូចធំ មកពីបណ្តាលខេត្តនានាកំពុងសម្រុកដឹកទំនិញគ្រប់ប្រភេទ ចេញពីស្រុកយួនរាល់ថ្ងៃ តាមរថយន្តធំៗ និងរថយន្តកូរ៉េ រថយន្តសាន់យ៉ុង រម៉កសន្តោងវែង យ៉ាងពេញបន្ទុក ជាប្រភពចំណូល របស់មេគយចល័តច្រកនេះ។
ហេតុនេះ លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ មិនគួរបណ្តែតបណ្តោយតទៅទៀតនោះទេ លោក គុណ ញឹម អគ្គនាយករដ្ឋករ.គយកម្ពុជា ពិនិត្យឡើងវិញខ្លះផង កុំឲ្យបុគ្គល មេគយចល័តច្រកបុសមន ប្រើកូនចៅចាំអង្គុយយកលុយ ពីក្រុមឈ្មួញដឹកទំនិញទាំងយប់ទាំងថ្ងៃ គ្មានចេញវិក័យប័ត្រឲ្យឡើយ។
ប្រភពពីមន្ត្រីពាក់ព័ន្ធនៅច្រកព្រំដែនបុសមន បានឲ្យដឹងទៀតថា ឈ្មួញធំៗ ដឹកទំនិញគ្រប់ប្រភេទ ចេញពីស្រុកយួន ចូលក្នុងខេត្តស្វាយរៀង និងឈ្មួញមកពីបណ្តាលខេត្តនានា សម្រុកដឹកទំនិញតាមច្រកនេះ បានក្លាយទៅជាប្រភពចំណូលដ៍សំខាន់ របស់ មេគយចល័តនិងបក្ខពួកបែងចែកផលប្រយោជន៍គ្នាធ្វើមានធ្វើបាន មិនខ្វល់ពីការរិះគន់អ្វីទាំងអស់។
ទន្ទឹមនឹងនេះឈ្មួញធំតូច ក្នុងខេត្តស្វាយរៀងនិងឈ្មួញដ៏ទៃទៀតមកពីខេត្តផ្សេងៗដឹកទំនិញគេចពន្ធបង់ពន្ធមិនគ្រប់ ចេញពីស្រុកយួនដូចជា÷ ផ្លែដូង ផ្លែឈើ ពូក តុជ័រ ធុងជ័រកៅអីជ័រ ដែកលួស កូនរទេះ មី ទឹកស្ទីង នឹងគ្រឿងកុំប៉ុងគ្រប់មុខ ត្អូញត្អែរ ប្រាប់ភ្នាក់ងារព័ត៌មានយើងឲ្យដឹងថា ពួកគាត់រកស៊ីសព្វថ្ងៃបានត្រឹមចិញ្ចឹម មេគយចល័តប្រចាំច្រកទ្វារព្រំដែនបុសមន កំណត់យកលុយ ថ្លៃបាយទឹក ក្នុងមួយរថយន្តធំៗចាប់ពី៦០ម៉ឺនរៀល ទៅ៧០ម៉ឺនរៀលជាកំហិត រីឯរថយន្តតូចនឹងរម៉កសន្តោងវែង បង់ចាប់២០ម៉ឺនរៀលទៅ៣០ម៉ឺនរៀលជាថ្នូរ មិនបង្ក្រាប ។
ដូច្នេះហើយលោក គុណ ញឹម អគ្គរដ្ឋករ. គយកម្ពុជា និងលោក អូន ព័ន្ធ មុន្នីរ័ត្ន រដ្ឋមន្ត្រីក្រសួងសេដ្ឋកិច្ចហិរញ្ញវត្ថុ ពិនិត្យឡើងវិញខ្លះផង ចំពោះមេគយធំៗ ច្រកទ្វារភាគីព្រំដែនបុសមន និង សមត្ថកិច្ចពាក់ព័ន្ធអង្គុយចាំយកលុយច្រើនស្ថាប័ន មិនចេញវិក័យបត្រឲ្យ ត្រូវបានលាតត្រដាង រិះគន់ពីសំណាក់ក្រុមឈ្មួញដឹកទំនិញ បញ្ជាក់ឲ្យដឹងថា ធ្វើឲ្យរដ្ឋត្រូវខាតបង់ចំណូលពន្ធយ៉ាងច្រើនសន្ធឹកសន្ធាប់ក្នុងមួយខែៗ ចំណែក លោក ហេង សំបូរ ប្រធានការិយាល័យគយខេត្តស្វាយរៀង រក្សាភាពស្ងៀមស្ងាត់៕
