កណ្ដាល ៖ ប្រភពពីប្រជាពលរដ្ឋ រស់នៅភូមិជ្រៃធំ ឃុំសំពៅពូន ស្រុកកោះធំ បានបញ្ជាក់ថា បុគ្គលដែលហ៊ានបេីកល្បែងបញ្ជាល់មាន់បៀរ អាប៉ោង និងល្បែងច្រេីនប្រភេទទៀតបង្កប់ក្នុងកាសុីណូ ហ្គ្រេនដ្រាហ្គន រីសត លេងភ្នាល់ដាក់លុយស៊ីសងខុសច្បាប់ យ៉ាងពពាក់ពពូន ប្រហែលជាមានខ្នងបង្អែករឹងមាំនៅពីក្រោយ ចាំជួយបិទបាំងទេីបធ្វើអ្វី ៗ តាមអំពេីចិត្ត។
ហេតុនេះ លោក នេត សាវឿន អគ្គស្នងការដ្ឋាននគរបាលជាតិ មិនគូរមេីលរំលងភាពអសកម្ម មន្ត្រីអាជ្ញាធរមូលដ្ឋាន ថ្នាក់ឃុំ និងសមត្ថកិច្ចនគរបាលស្រុកកោះធំ ព្រមទាំងសមត្ថកិច្ចពាក់ព័ន្ធថ្នាក់ខេត្ត មិនទាន់ចាត់វិធានការបង្ក្រាប ល្បែងបញ្ជាល់មាន់ខ្នាតធំ នៅខ្សែបន្ទាត់ច្រកទ្វារអន្តរជាតិព្រំដែនជ្រៃធំ ឲ្យស្របតាមគោលនយោបាយភូមិ ឃុំ មានសុវត្ថិភាពឡើយ សម្ងំទទួលផលប្រយោជន៍ ជាថ្នូរ។
សូម្បីតែ លោក គង់ សោ ភ័ណ្ឌ អភិបាលខេត្តកណ្តាល និងលោក ឈឿន សុ ចិត្រ ស្នងការដ្ឋាននគរបាលខេត្តកណ្តាល មិនហ៊ានប៉ះពាល់ ម្ចាស់បនល្បែងបញ្ជាល់មាន់ដែរ ហើយបុគ្គលរូបនេះ អាចប្រមូលលុយបានច្រើនសន្ធឹកសន្ធាប់ក្នុងមួយថ្ងៃៗ កំពុងបើកលេងយ៉ាងពេញទំហឹង មិនគូរបណ្តែតបណ្តោយ ឲ្យមានល្បែងបញ្ជាល់មាន់ នៅទឹកដីខេត្តកណ្តាលនោះទេ ដើម្បីបង្រឹងសន្តិសុខសង្គម។
បញ្ហានេះ លោក អេង សុចិត្រ អភិបាលស្រុកកោះធំ និង លោក ស៊ីម ឃាង អធិការដ្ឋាននគរបាលស្រុកកោះធំ បណ្តោយឲ្យមានល្បែងច្រើនប្រភេទ ដូចជា បញ្ជាល់មាន់ បៀរ អាប៉ោង មានពីទីតាំងបង្កប់នៅ កាស៊ីណូ ហ្គ្រេនដ្រាហ្គន រីសត និងកាឡាក់ស៊ីជ្រៃធំ ហ៊ានប្រឆាំងបទបញ្ជា សម្តេចតេជោ ហ៊ុន សែន ទើបប្រកាសនៅពេលថ្មីៗនេះ ឲ្យបិទល្បែងភ្នាល់ដាក់លុយស៊ីសងខុសច្បាប់ គ្រប់ប្រភេទ ទាំងអស់ដែលកើតមាន ក្នុងទឹកដីរបស់ខ្លួន។
មួយរយៈពេលប្រមាណ១ខែចុងក្រោយ កាស៊ីណូនេះ មានពលរដ្ឋខែ្មរសម្រុកចូលលេងល្បែងបញ្ជាល់មាន់ មកពីគ្រប់ទិសទីយ៉ាងគគ្រឹកគគ្រេង អ្នកចាញ់ច្រើន ជាងអ្នកឈ្នះ រីឯសមត្ថកិច្ចពាក់ពន្ធ័ការពារច្រកទ្វារអន្តរជាតិព្រំដែនជ្រៃធំ ជាអ្នកបើកភ្លើងខៀវ ទើបបុគ្គលជាម្ចាស់ទីតាំង ប្រព្រឹត្តទៅដោយរលូន ។
សេចក្តីរាយការណ៍ ពីប្រជាពលរដ្ឋ នៅជិតច្រកទ្វារអន្តរជាតិព្រំដែនជ្រៃធំ បានបញ្ជាក់ថា ចាប់តាំងពីមានល្បែងបញ្ជាល់មាន់ មកដល់បច្ចុប្បន្ននេះ ពួកគាត់ព្រួញបារម្ភយ៉ាងខ្លាំង ខ្លាច កើតជា ចោរលួច ឆក់ ប្លន់ អំពើហឹង្សាក្នុងគ្រូសារ និងរីករាលដាលគ្រឿងញៀនគូរឲ្យកត់សម្គាល់ថែមទៀតផង។
ប្រជាពលរដ្ឋ រស់នៅភូមិជ្រៃធំ ឃុំសំពៅពូន ស្រុកកោះធំ បានអំពាវនាវដល់ថ្នាក់ដឹកនាំក្រសួងមហាផ្ទៃ ចាត់មន្ត្រីក្រោមឱវាទចុះពិនិត្យទង្វើភាពមិនប្រក្រតី របស់ម្ចាស់សង្វៀនបញ្ជាល់មាន់ ថ្លេីមធំ បើកឲ្យពលខែ្មរចូលលេង នៅកាស៊ីណូ ហ្គ្រេនដ្រា រីសត និងកាឡាក់ស៊ីជ្រៃធំ ជាបន្ទាន់ ដើម្បីបង្រឹងសន្តិសុខសង្គមជូនពលរដ្ឋ ក្នុងមូលដ្ឋាន៕
