សេចក្ដីរាយការណ៍ពីប្រជាពលរដ្ឋក្នុងឃុំអូរល្ហុង សង្កាត់និមិត្ត បានឲ្យដឹងថា នៅចំណុចខាងក្រោយសាលាបឋមសិក្សាសុខសាន្ត មានគេបើកល្បែងស៊ីសងខុសច្បាប់ហើយអ្នកបើកល្បែងស៊ីសងខុសច្បាប់មាន៤នាក់ ទី១-ឈ្មោះ ម៉េង ជាអតីតមន្ត្រីអាវុធហត្ថ, ទី២-ឈ្មោះ ជាង ហៅគុជ, ទី៣-ឈ្មោះ ភារម្យ និងទី៤-ម្ចាស់ផ្ទះឈ្មោះ ញ៉ក់ ដែលមានការឃុបឃិតពីមន្ត្រីអាជ្ញាធរនិងសមត្ថកិច្ចមូលដ្ឋាន។ ប្រជាពលរដ្ឋក្នុងឃុំអូរល្ហុង បានឲ្យដឹងថា ល្បែងអាប៉ោងនិងបៀរត្រូវបានគេបើកលេងយ៉ាងរលូន ហើយក្នុងមួយក្ដារៗមានអ្នកចាញ់អស់រាប់លានរាល ឬរាប់រយរាប់ពាន់ដុល្លារ។ តាមការកត់សម្គាល់របស់ប្រជាពលរដ្ឋបានឲ្យដឹងថា ពួកគាត់មិនដែលឃើញមន្ត្រីអាជ្ញាធរមូលដ្ឋានសង្កាត់និមិត្ត ឬនគរបាលប៉ុស្ដិ៍រដ្ឋបាលសង្កាត់និមិត្ត ចុះទៅបង្ក្រាបល្បែងស៊ីសងខុសច្បាប់ក្នុងភូមិអូរល្ហុង នោះឡើយ។
ប្រជាពលរដ្ឋនៅក្នុងសង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ បានអំពាវនាវឲ្យលោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ និងលោក អ៊ុំ រាត្រី អភិបាលខេត្តបន្ទាយមានជ័យ ចាត់វិធានការលុបបំបាត់ល្បែងស៊ីសងក្នុងមូលដ្ឋានពួកគាត់ជាបន្ទាន់។ ប្រជាពលរដ្ឋបានលើកឡើងថា នាយប៉ុស្ដិ៍នគរបាលរដ្ឋបាលសង្កាត់និមិត្ត ក៏ដូចជាអធិការនគរបាលក្រុងប៉ោយប៉ែត មិនចាត់វិធានការបង្ក្រាបល្បែងស៊ីសងខុសច្បាប់ដែលត្រូវគេបើកលេងយ៉ាងពេញបន្ទុកក្នុងភូមិអូរល្ហុង សង្កាត់និមិត្ត ក្រុងប៉ោយប៉ែត នោះឡើយ។ ផ្ទុយទៅវិញទំនងជាមេនគរបាលប៉ុស្ដិ៍រដ្ឋបាលសង្កាត់និមិត្ត ព្រមទាំងមន្ត្រីអាជ្ញាធរនិងអធិការនគរបាលក្រុងប៉ោយប៉ែត ទទួលបានផលប្រយោជន៍អ្នកបើកល្បែងស៊ីសងខុសច្បាប់ក្នុងឃុំអូរល្ហុង ទើបបណ្ដោយឲ្យល្បែងស៊ីសងរាលដាលយ៉ាងអនាធិបតេយ្យ។
តាមប្រភពពីប្រជាពលរដ្ឋក្នុងសង្កាត់និមិត្ត បានឲ្យដឹងទៀតថា ក្រោយពេលល្បែងអាប៉ោងនិងបៀរត្រូវគេបើកលេងយ៉ាងពេញបន្ទុកក្នុងភូមិអូរល្ហុង រួចមកគឺបទល្មើសផ្សេងៗជាពិសេសអំពើចោរកម្មកើតឡើងគួរឲ្យព្រួយបារម្ភ ព្រោះសមត្ថកិច្ចមូលដ្ឋាននិងមន្ត្រីអាជ្ញាធរមូលដ្ឋានសម្ងំស្ងាត់ឈឹង។
ប្រការនេះហើយទើបប្រជាពលរដ្ឋអំពាវនាវយ៉ាងទទូចដល់លោក អាត់ ខែម ស្នងការនគរបាលខេត្តបន្ទាយមានជ័យ និងលោក អ៊ុំ រាត្រី អភិបាលខេត្តបន្ទាយមានជ័យ ចាត់វិធានការលុបបំបាត់ល្បែងស៊ីសងក្នុងសង្កាត់និមិត្ត ហើយគួរចាត់វិធានការលើសមត្ថកិច្ចនិងមន្ត្រីអាជ្ញាធរដែលអសកម្មផងដែរ។
ដោយហេតុថា ការដែលមន្ត្រីអាជ្ញាធរមូលដ្ឋាននិងសមត្ថកិច្ចមូលដ្ឋាន បណ្ដោយឲ្យល្បែងស៊ីសងកើតឡើងយ៉ាងពេញបន្ទុក គឺជាការបំពានទៅលើគោលនយោបាយភូមិ-ឃុំ មានសុវត្ថិភាពទាំង៩ចំណុចយ៉ាងងងើល ហើយធ្វើឲ្យប្រជាពលរដ្ឋបាត់បង់ភាពកក់ក្ដៅ។
