ព្រៃវែង ៖ ប្រភពពីប្រជាពលរដ្ឋ រស់នៅភូមិព្រែកព្នៅ ឃុំព្រែកញ្នៅ ស្រុកពារាំង បានបញ្ជាក់ឲ្យដឹងថា ល្បែងបញ្ជល់មាន់តាមទូរទស្សន៍អនឡាញ ជាច្រើនទីតាំង បើកលេងយ៉ាងពេញបន្ទុក សមត្ថកិច្ចពាក់ព័ន្ធក្នុងខេត្តព្រៃវែង មិនចាត់វិធានបង្ក្រាប ខ្លាចបាត់បង់ចំណូលប្រចាំខែ។
ជាក់ស្តែងល្បែងបញ្ជាល់មាន់ ស៊ីសងខុសច្បាប់ បើកលេងនៅផ្ទះលោក អ៊ួច និង ផ្ទះលោក ឌឿន តាមបណ្ដោយផ្លូវជាតិលេខ ៨ ក្នុងភូមិព្រែកព្នៅ ឃុំព្រែកព្នៅ ស្រុកពារាំង ខេត្តព្រៃវែង ដោយឡែកលោក លី ធី នាយប៉ុស្តិ៍នគរបាលឃុំព្រែកព្នៅ និងលោកឡុង ប៊ុន ធឿន អធិការដ្ឋាននគរបាលស្រុកពារាំង សម្ងំទទួលផលប្រយោជន៍ ជាថ្នូរមិនបង្ក្រាប។
មជ្ឈដ្ឋានខាងក្រៅ.! និងពលរដ្ឋនៅភូមិព្រែកព្នៅ បានរិះគន់ចំៗ ទៅលើអាជ្ញាធរមូលដ្ឋានមានសមត្ថកិច្ចពាក់ពន្ធ័ ក្នុងឃុំព្រែកព្នៅ មិនចាត់វិធានការបង្ក្រាប ឲ្យស្របតាមគោលនយោបាយ ភូមិ ឃុំ មានសុវត្ថិភាព៧ចំណុច ដែលដាក់ចេញដោយក្រសួងមហាផ្ទៃនោះទេ។
ប្រជាពលរដ្ឋរស់នៅ ភូមិព្រែកព្នៅ ឃុំព្រែកព្នៅ ស្រុកពារាំងបានបញ្ជាក់បន្ថែមថា ចាប់តាំងពីមានល្បែងបញ្ជាល់មាន់តាមទូរទស្សន៍អនឡាញ ភ្នាល់ដាក់លុយរាប់សែន រាប់លាន រៀល លេងស៊ីសងខុសច្បាប់ ពួកគាត់ខ្លាចកើត ដូចជាៈ ចោរលួច ឆក់ ប្លន់ អំពើហិង្សាក្នុងគ្រួសារ និងរីករាលដាលគ្រឿងញៀនគូរឲ្យកត់សម្គាល់ថែមទៀតផង មកពីដើមចោម ផ្តើមចេញល្បែងអនឡាញទាំងនេះ។
ហេតុនេះ លោក ព្រំ សន្ធរ ស្នងការដ្ឋាននគរបាលខេត្តព្រៃវែង គូរពិនិត្យឡើងវិញខ្លះផង ចំពោះភាពអសកម្ម របស់លោក ឡុង ប៊ុន ធឿន អធិការដ្ឋាននគរបាលស្រុកពារាំង និងលោក លី ធី មេប៉ុស្តិ៍នគរបាលឃុំព្រែកព្នៅ បណ្ដែតបណ្ដោយឲ្យអ្នកញៀនល្បែងបញ្ជាល់មាន់តាមអនឡាញ លេងយ៉ាងពពាក់ពពូនក្នុងមូលដ្ឋានរបស់ខ្លួនទៀតឡើយ។
ប្រជាពលរដ្ឋ រស់នៅភូមិព្រែកព្នៅ ឃុំព្រែកព្នៅ ស្រុកពារាំង បានអំពាវនាវដល់ លោក នេត សាវឿន អគ្គស្នងការដ្ឋាននគរបាលជាតិ និងលោក ព្រំ សន្ធរ ស្នងការដ្ឋាននគរបាលខេត្តព្រៃវែង ចាត់វិធានការក្ដៅ ឲ្យមន្ត្រីក្រោមឱវាទចុះបង្ក្រាបល្បែងបញ្ជាល់មាន់តាមអនឡាញ នៅផ្ទះលោក អ៊ួច និងផ្ទះ លោក ឌឿន ជាបន្ទាន់ ដេីម្បីពង្រឹងសន្តិសុខសង្គម៕
