ប្រភពពីសមត្ថកិច្ចពាក់ព័ន្ធនៅច្រកទ្វារអន្តរជាតិបាវិត បានឲ្យដឹងថា នៅសងខាងច្រកទ្វារអន្តរជាតិបាវិត មានច្រករបៀងដែលមានជនជាតិខ្មែរនិងជនជាតិយួនរាប់រយនាក់ចេញចូលទៅមកដោយខុសច្បាប់ជារៀងរាល់ថ្ងៃ ហើយគ្មានការត្រួតពិនិត្យត្រឹមត្រូវពីសំណាក់លោក ខាត់ សារ៉ាត់ និងមន្ត្រីក្រោមឱវាទនោះទេ។
ប្រភពបានឲ្យដឹងទៀតថា ពលរដ្ឋខ្មែរដែលចេញចូលតាមច្រករបៀងសងខាងច្រកទ្វារអន្តរជាតិបាវិត ផ្នែកខាងជើងនិងផ្នែកខាងត្បូងយ៉ាងរលូនដោយគ្រាន់តែបង់លុយតាមការកំណត់របស់លោក ខាត់ សារ៉ាត់ និងបក្ខពួក។ ប្រភពបានឲ្យដឹងទៀតថា សម្រាប់ពលរដ្ឋខ្មែរដែលមានលិខិតឆ្លងដែន ហើយមិនឆ្លងកាត់តាមច្រកទ្វារអន្តរជាតិ ត្រូវជិះម៉ូតូឌុបវាងតាមច្រករបៀង២កន្លែងនោះដោយបង់លុយត្រឹម៣ម៉ឺនរៀល គឺ១ម៉ឺនរៀលសម្រាប់ថ្លៃម៉ូតូឌុបនិង២ម៉ឺនរៀលសម្រាប់បង់ឲ្យនគរបាលអន្តោប្រវេសន៍។ ក្នុងមួយថ្ងៃៗមានពលរដ្ឋខ្មែរឆ្លងដែនចេញចូលតាមច្រករបៀងសងខាងច្រកទ្វារអន្តរជាតិបាវិតរាប់រយនាក់ ដូច្នេះនគរបាលអន្តោប្រវេសន៍ប្រមូលលុយបានមិនតិចនោះទេ។
អំពើពុករលួយច្រើនបែបច្រើនយ៉ាងរបស់លោក ខាត់ សារ៉ាត់ មេនគរបាលអន្តោប្រវេសន៍ច្រកទ្វារអន្តរជាតិបាវិត ក្រុងបាវិត ខេត្តស្វាយរៀង ត្រូវបានបើកកកាយជាបន្តបន្ទាប់ ជាពិសេសការប្រមូលលុយពីច្រករបៀងនៅសងខាងច្រកទ្វារអន្តរជាតិបាវិត យ៉ាងពេញបន្ទុក។ ក៏ប៉ុន្តែរហូតមកដល់ពេលនេះនាយឧត្តមសេនីយ៍ គៀត ច័ន្ទថារិទ អគ្គនាយកនៃអគ្គនាយកដ្ឋានអន្តោប្រវេសន៍ មិនទាន់ចាត់វិធានការទប់ស្កាត់អំពើពុករលួយរបស់លោកឧត្តមសេនីយ៍ត្រី ខាត់ សារ៉ាត់ នៅឡើយទេដែលជាហេតុធ្វើឲ្យលោក ខាត់ សារ៉ាត់ កាន់តែមានអំណាចខ្លាំងក្លាក្នុងការប្រព្រឹត្តអំពើពុករលួយ។
ប្រភពដែលស្និទ្ធនឹងលោក ខាត់ សារ៉ាត់ មេនគរបាលអន្តោប្រវេសន៍ច្រកបាវិត បានឲ្យដឹងថា សម្រាប់ពលរដ្ឋខ្មែរឆ្លងដែនចូលទៅស្រុកយួនដើម្បីពិនិត្យនិងព្យាបាលជំងឺហើយគ្មានលិខិតឆ្លងដែន ត្រូវបង់លុយយ៉ាងតិចក្នុងម្នាក់ៗ៤០ដុល្លារ គឺពេលទៅ២០ដុល្លារនិងពេលត្រឡប់មកវិញ២០ដុល្លារ។ អំពើពុករលួយបែបនេះរបស់លោក ខាត់ សារ៉ាត់ គឺជារឿងមិនអាចបិទបាំងបានឡើយ ដូច្នេះនាយឧត្តមសេនីយ៍ គៀត ច័ន្ទថារិទ្ធ អគ្គនាយកនៃអគ្គនាយកដ្ឋានអន្តោប្រវេសន៍ មិនគួរបណ្ដែតបណ្ដោយតទៅទៀតទេ។
ទន្ទឹមនឹងនេះករណីលោក ខាត់ សារ៉ាត់ និងបក្ខពួកគាបយកលុយពីក្រុមឈ្មួញនាំចូលទំនិញពីស្រុកយួនតាមច្រកទ្វារអន្តរជាតិបាវិត នៅតែកើតឡើងយ៉ាងពេញបន្ទុកដដែល ព្រោះលោក ខាត់ សារ៉ាត់ អាងមានខ្នងបង្អែករឹងមាំធ្វើអ្វីៗតាមអំពើចិត្ត។
តាមការបង្ហើបពីមន្ត្រីនៅច្រកទ្វារអន្តរជាតិបាវិត បានឲ្យដឹងថា ទោះបីពលរដ្ឋខ្មែរមានលិខិតឆ្លងដែនត្រឹមត្រូវក៏ចៀសមិនផុតពីបង់លុយថ្លៃបំពេញឯកសារនិងប្រថាប់ត្រាពី១ម៉ឺនរៀលទៅ២ម៉ឺនរៀលក្នុងម្នាក់ៗមិនអាចតវ៉ាបានទេ។ ចំណែកជនជាតិយួនដែលចូលមកលេងល្បែងក្នុងកាស៊ីណូលើទឹកដីខ្មែរតាមតំបន់ព្រំដែនខ្មែរ-យួន នៅក្រុងបាវិត សុទ្ធតែត្រូវបង់លុយឲ្យនគរបាលអន្តោប្រវេសន៍ក្នុងម្នាក់ៗ១០ម៉ឺនដុងឬប្រមាណ២ម៉ឺនរៀលជាថ្នូរនឹងការចេញចូលស្រួលៗ។ តាមរយៈការប្រព្រឹត្តអំពើពុករលួយច្រើនបែបច្រើនយ៉ាង គឺលោក ខាត់ សារ៉ាត់ និងមន្ត្រីក្រោមឱវាទអាចប្រមូលលុយបានរាប់ពាន់រាប់ម៉ឺនដុល្លារក្នុងមួយថ្ងៃៗ ហើយលោក ខាត់ សារ៉ាត់ តែងយកឈ្មោះនាយឧត្តមសេនីយ៍ គៀត ច័ន្ទថារិទ្ធ ទៅប្រើដើម្បីការពារទង្វើមិនប្រក្រតីនិងអំពើពុករលួយរបស់ខ្លួន ៕
