ព្រះវិហារ ÷ មន្ត្រីអង្គការក្រៅរដ្ឋាភិបាលឃ្លាំមើលបទល្មើសព្រៃឈើក្នុងខេត្តព្រះវិហារបានបញ្ជាក់ថា កាលពី ថ្ងៃទី 04 ខែមិថុនា ឆ្នាំ២០២២ មានរថយន្តយីឌុប 5 ផ្លូវ ពាក់ស្លាកលេខ ក្រចេះ3A.0340 បានដឹកជញ្ជួនឈើ ចេញពីខេត្តព្រះវិហារចូលដេប៉ូ នៅភូមិតាឡែក ជិតស្នាក់ការបរិស្ថានខេត្តកំពង់ធំ គ្មានសមត្ថកិច្ចពាក់ពន្ធ័ហ៊ានបង្ក្រាប។
ទោះបីបណ្តាញព័ត៌មានបានចុះផ្សាយ និងមានរបាយការណ៍ ស៊ើបអង្កេតនានា របស់សង្គមស៊ីវិលក៏ដូចជាសក្ខីកម្មរបស់ប្រជាសហគមន៍ផងដែរ ដែលបង្ហាញថា ព្រៃឈើក្នុងតំបន់ព្រៃឡង់ និងព្រៃព្រះរកាក្នុងខេត្តព្រះវិហារ នៅតែរងការ កាប់បំផ្លិចបំផ្លាញជារៀងរាល់ថ្ងៃ ចំណែកប្រធានមន្ទីរបរិស្ថានខេត្តព្រះវិហារ និងប្រធានមន្ទីរកសិកម្មខេត្តព្រះវិហារ រក្សាភាពស្ងៀមស្ងាត់ទើបពួកឈ្មួញធ្វើអ្វីៗ តាមអំពើចិត្ត។
ហេតុអ្វីបានជាឈ្មួញឈើឈ្មោះ សាក់ សិច និងឈ្មោះ គឹម ឡាយ នៅក្នុងទឹកដីខេត្តព្រះវិហារហ៊ានផ្គេីននិងអានុសាស្ត្ររបស់ សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា កន្លងមកដែលធ្លាប់ដាក់បទបញ្ជាឲ្យនាយឧត្ដមសេនីយ៍ សៅ សុខា មេប៉េអឹមផ្ទៃប្រទេស ចាត់វិធានការទៅលើមន្ត្រីក្រោមឱវាទចុះបង្ក្រាប ព្រៃឈើអោយខាន់តែបាន ។
ប្រភពបានបន្តទៀតថា ឈើប្រណីត ៗត្រូវ បានឈ្មោះ គឹម ឡាយ ដឹកនាំមេការសំខាន់ៗមួយក្រុមរួមមាន ១.ឈ្មោះ មីន ២.ឈ្មោះ ណឹត ៣.ឈ្មោះ វុធ ៤.ចែ ណាង ៥.យាយ ខេង ៦.ឈ្មោះ ថី ៧.តា រីន កាប់ឈើក្នុងព្រៃព្រះរកានិងព្រៃឡង់យ៉ាងគំហុក រង្គះរង្គល ហើយដឹកចេញតាមរទេះគោ រទេះក្របី មកដាក់នៅចំណុចម្លូព្រៃ ឬពោធិ៍ប្រមេរ រីឯមន្ត្រីជំនាញពាក់ពន្ធ័ សម្ងំទទួលលាភសក្ការៈជាថ្នូរមិនបង្ក្រាប។
មេឈ្មួញកណ្ដាលម្នាក់ទៀតឈ្មោះ សាក់ សិច ដឹកនាំមេការមួយក្រុមទៀតរួមមាន ១.ឈ្មោះឆើត ២. ឈ្មោះ ប្រុស ៣.ឈ្មោះ បុប្ផា ៤.ឈ្មោះ ទូ ជាដើមចូលកាប់ឈើ ក្នុងស្រុកជ័យសែនតំបន់ព្រៃឡង់ ហើយដឹកចេញមកចំណុចស្រែវាលមកស្តុបទុក នៅក្រាំងដូងក្នុងស្រុកត្បែងមានជ័យខេត្តព្រះវិហារ រួចដឹកបន្តមកចែកចាយនៅដេប៉ូ ឈ្មោះ ជិន គឹម អូន ក្នុងភូមិតាឡែក ជិតស្នាក់ការបរិស្ថានក្នុងខេត្តកំពង់ធំ ឈើទាំងពីក្រុមខាងលើនេះ ត្រូវ បាន ឈ្មួញ ដឹក ជញ្ជូនស្ទើរតែរៀងរាល់ ថ្ងៃ និង តាម គ្រប់ មធ្យោបាយ ទៅ លក់ ឲ្យដេប៉ូផ្សេងៗ និងតាមបណ្តាលខេត្តនានាយ៉ាងរំភេីយ។
ប្រជាពលរដ្ឋ ក្នុងស្រុកជ័យសែន បានរិះគន់ចំៗ ទៅលើមន្ត្រីអាជ្ញាធរមានសមត្ថកិច្ចពាក់ព័ន្ធ ចាប់ បានតែ ឈ្មួញឈើ រកស៊ីតូចតាច ប៉ុណ្ណោះ រីឯ ឈ្មួញ រកស៊ី ឈើធំ ៗ ដូចជាឈ្មោះ ជិន គឹម អូន លោក សាក់ សិច និង លោក គឹម ឡាយ មិនដែល ចាប់ បាននោះទេ ម្យ៉ាងវិញ ក្រុមឈ្មួញដឹកជញ្ជូនយកទៅលក់បន្ត ក្នុងខេត្តនានាយ៉ាងសុខស្រួលបំផុត គ្មានសមត្ថកិច្ចពាក់ព័ន្ធក្នុងព្រះវិហារ និងសមត្ថកិច្ចពាក់ព័ន្ធខេត្តកំពង់ធំ ហ៊ានប៉ះពាល់ឡើយ ព្រោះបង់លុយគ្រប់ស្ថាប័នពាក់ព័ន្ធអស់ហេីយ។
ប្រជាពលរដ្ឋ រស់នៅស្រុកត្បែងមានជ័យ និងស្រុកជ័យសែន អំពាវនាវដល់នាយឧត្តមសេនីយ៍ សៅ សុខា មេប៉េអឹមផ្ទៃប្រទេស និងជាគណះកម្មការថ្នាក់ជាតិ ទប់ស្កាត់បទល្មើសព្រៃឈើធនធានធម្មជាតិ មេត្តាបញ្ជាមេប៉េអឹមកងរាជអាវុធហត្ថខេត្តព្រះវិហា និងមន្ត្រីក្រោមឱវាទចុះពិនិត្យព្រៃឈើក្នុងដែនជម្រកព្រៃឡង់ និងព្រៃព្រះរកា ដែលនៅសេសសល់បន្តិចបន្តួច កំពុងរងការកាប់បំផ្លិចបំផ្លាញវិនាសហិនហោច ក្រោមស្នាដៃឈ្មួញល្បីៗ ដែលបានរៀបរាប់ខាងលើជាបន្ទាន់ ៕
