មន្ត្រីអង្គការក្រៅរដ្ឋាភិបាលនៅក្នុងខេត្តព្រះវិហារ បានឲ្យដឹងថា បច្ចុប្បន្នក្រុមហ៊ុនដោន ប្រមូលទិញឈើនៅក្នុងតំបន់ព្រៃព្រះរកា និងតំបន់គូលែនព្រហ្មទេព យ៉ាងពេញបន្ទុក រួចហើយដឹកជញ្ជូនចូលទីតាំងក្រុមហ៊ុនរបស់ខ្លួនយ៉ាងរលូនដើម្បីឲ្យក្លាយជាឈើស្របច្បាប់។
មន្ត្រីអង្គការក្រៅរដ្ឋាភិបាល និងមជ្ឈដ្ឋាននានាបានអំពាវនាវឲ្យលោក វេង សាខុន រដ្ឋមន្ត្រីក្រសួងកសិកម្ម និងលោក កែវ អូម៉ាលីស្ស ប្រធានរដ្ឋបាលព្រៃឈើនៃក្រសួងកសិកម្ម ពិនិត្យឡើងវិញជាបន្ទាន់ទៅលើអាជីវកម្មរបស់ក្រុមហ៊ុនដោន។
ដោយហេតុថា មន្ត្រីជំនាញ និងសមត្ថកិច្ចពាក់ព័ន្ធក្នុងខេត្តព្រះវិហារ បណ្ដោយឲ្យក្រុមហ៊ុនដោន ធ្វើអ្វីៗតាមអំពើចិត្តក្នុងខណៈដែលព្រៃឈើក្នុងតំបន់ព្រៃព្រះរកា និងតំបន់គូលែនព្រហ្មទេព រងការបំផ្លាញយ៉ាងមហន្តរាយ។
កាលពីយប់ថ្ងៃទី27 ខែឧសភា ឆ្នាំ2022 មានរថយន្តធុនធំ ប្រភេទវ៉េអង ចំនួន3គ្រឿងដឹកជញ្ជូនឈើចេញពីក្រុមហ៊ុនដោន មានទីតាំងនៅភូមិព្រីងធំ ឃុំព្រីងធំ ស្រុកជាំក្សាន្ត ខេត្តព្រះវិហារ។
ពេលរថយន្តមកដល់ចំណុចផ្លូវជាតិលេខ62 ចម្ការស្រម៉ូវ សមត្ថកិច្ចបានឃាត់រថយន្ត១គ្រឿងដើម្បីពិនិត្យ ហើយរថយន្ត2គ្រឿងទៀតសមត្ថកិច្ចមិនបានឃាត់ទុកដើម្បីពិនិត្យនោះឡើយ។ ក្នុងរថយន្តដែលសមត្ថកិច្ចត្រួតពិនិត្យ គឺមានច្បាប់អនុញ្ញាតឲ្យដឹកឈើ17ម៉ែត្រគូប កម្ពស់ពីបាតទ្រុងរថយន្ត1ម៉ែត្រគូប ប៉ុន្តែជាក់ស្ដែងរថយន្តនោះផ្ទុកឈើពីបាតរថយន្តដល់ដំបូល គឺលើសចំនួនកំណត់យ៉ាងតិច25ម៉ែត្រគូប។
នៅយប់ថ្ងៃទី29 ខែឧសភា ឆ្នាំ2022 មានរថយន្តធុនធំដឹកជញ្ជូនឈើចេញពីទីតាំងក្រុមហ៊ុនដោន ចំនួន4គ្រឿងទៀត ដោយគ្មានមន្ត្រីជំនាញ ឬសមត្ថកិច្ចពាក់ព័ន្ធណាចាត់វិធានការទប់ស្កាត់ទាល់តែសោះ។
សូម្បីតែលោក កង សៅគុណ មេបញ្ជាការកងរាជអាវុធហត្ថខេត្តព្រះវិហារ ព្រមទាំងលោក សួស សុខដារ៉ា ស្នងការនគរបាលខេត្តព្រះវិហារ និងលោក ប្រាក់ សុវណ្ណ អភិបាលខេត្តព្រះវិហារ ក៏រក្សាភាពស្ងៀមស្ងាត់ដែរទុកឲ្យក្រុមហ៊ុនដោន ធ្វើអ្វីៗតាមអំពើចិត្ត។
ប្រការនេះកំពុងធ្វើឲ្យព្រៃឈើក្នុងតំបន់ព្រៃព្រះរកា និងតំបន់គូលែនព្រហ្មទេព ត្រូវប្រឈមនឹងសេចក្ដីវិនាស ព្រោះក្រុមហ៊ុនដោន កំពុងបង្កើនសកម្មភាពដឹកជញ្ជូនឈើយ៉ាងពេញបន្ទុក ហើយមន្ត្រីជំនាញ និងសមត្ថកិច្ចមិនហ៊ានប៉ះពាល់។
