ក្រចេះ ÷ ថ្មីៗនេះរថយន្តសាំយ៉ុងដឹកជញ្ជូនឈើខុសច្បាប់របស់មេឈ្មួញជេីងខ្លាំងម្នាក់ឈ្មោះចែ មុំ បានខូចតាមផ្លូវនៅស្រុកក្រូចឆ្មារ ខេត្តត្បូងឃ្មុំ ប៉ុន្តែគ្មានមន្ត្រីជំនាញឬសមត្ថកិច្ចណាហ៊ានទៅក្បែររថយន្តដឹកឈើរបស់មេឈ្មួញនោះឡើយ។
ប្រភពស្និទ្ធនឹងមេឈ្មួញនិងបក្សពួករបស់ ចែ មុំ បានបង្ហើបឲ្យដឹងថា ឈឈ្មួញរូបនេះ មានខ្នងបង្អែកក្រាស់ ហើយចេះបែងចែកផលប្រយោជន៍ដល់មន្ត្រីជំនាញ និងសមត្ថកិច្ចពាក់ព័ន្ធក្នុងខេត្តក្រចេះ ក៏ដូចជាមន្ត្រីជំនាញ និងសមត្ថកិច្ចពាក់ព័ន្ធក្នុងខេត្តត្បូងឃ្មុំ ជាប្រចាំទើបអ្វីៗអាចប្រព្រឹត្តទៅដោយរលូន។
បញ្ហានេះគឺជារឿងដែលលោក វ៉ា ថន អភិបាលខេត្តក្រចេះ ក៏ដូចជាលោក ជាម ច័ន្ទសោភ័ណ អភិបាលខេត្តត្បូងឃ្មុំ មិនគួរបណ្ដែតបណ្ដោយតទៅទៀតទេ ព្រោះចែ មុំ ល្បីខាងដឹកជញ្ជូនឈើខុសច្បាប់ច្រើនឆ្នាំមកហើយ។
មន្ត្រីអង្គការក្រៅរដ្ឋាភិបាលដែលឃ្លាំមើលបទល្មើសព្រៃឈើក្នុងខេត្តក្រចេះ បានឲ្យដឹងថា ឈ្មួញឈ្មោះ ចែ មុំ ដែលល្បីល្បាញខាងធ្វើសកម្មភាពដឹកជញ្ជូនឈើពីខេត្តក្រចេះ ចូលខេត្តត្បូងឃ្មុំ ជាច្រើនឆ្នាំមកហើយនោះ បច្ចុប្បន្ននៅតែធ្វើសកម្មភាពដឹកជញ្ជូនឈើខុសច្បាប់តាមអំពើចិត្តរបស់ខ្លួនដដែល។
មន្ត្រីជំនាញ និងសមត្ថកិច្ចក្នុងខេត្តក្រចេះ ក៏ដូចជាមន្ត្រីជំនាញ និងសមត្ថកិច្ចក្នុងខេត្តត្បូងឃ្មុំ មិនហ៊ានប៉ះពាល់ឈ្មួញឈ្មោះ ចែ មុំ នោះទេដោយសារឈ្មួញម្នាក់នេះមានខ្នងបង្អែករឹងមាំ។
សូម្បីតែលោក សាន្ត ប៊ុនថាន មេបញ្ជាការកងរាជអាវុធហត្ថខេត្តក្រចេះ និងលោក លន់ សុផាត ស្នងការនគរបាលខេត្តក្រចេះ ក៏រក្សាភាពស្ងៀមស្ងាត់ដែរ ទោះបីត្រូវប្រឈមនឹងការរិះគន់ក៏ដោយ។
មជ្ឈដ្ឋានខាងក្រៅ.! រិគន់ចំៗទៅលេីឈ្មួញឈ្មោះ ចែ មុំ បានឲ្យដឹងទៀតថា បើគ្មានការឃុបឃិតជាប្រព័ន្ធទេនោះគឺឈ្មួញម្នាក់នេះមិនអាចដឹកជញ្ជូនឈើពីខេត្តក្រចេះ ចូលខេត្តត្បូងឃ្មុំ បានឡើយ ហើយត្រូវប្រឈមនឹងការបង្ក្រាបជាមិនខាន។
ប៉ុន្តែដោយសារឈ្មួញឈ្មោះ ចែ មុំ មានខ្នងបង្អែកក្រាស់ ហើយជាប្រភពចំណូលរបស់មន្ត្រីធំៗមួយចំនួននៅខេត្តក្រចេះ និងខេត្តត្បូងឃ្មុំ ទើបមន្ត្រីជំនាញ និងសមត្ថកិច្ចក្នុងខេត្តទាំង២នេះមិនហ៊ានប៉ះពាល់ទាល់តែសោះ។
ជាពិសេសលោក សាន្ត ប៊ុនថាន មេបញ្ជាការកងរាជអាវុធហត្ថខេត្តក្រចេះ ព្រមទាំងលោក លន់ សុផាត ស្នងការនគរបាលខេត្តក្រចេះ បណ្ដោយឲ្យចែ មុំ ដឹកជញ្ជូនឈើពីខេត្តក្រចេះ ចូលខេត្តត្បូងឃ្មុំ ទាំងថ្ងៃទាំងយប់តាមអំពើចិត្ត។
