ប្រភពពីប្រជាពលរដ្ឋ រស់នៅភូមិព្រៃស្វាយ ឃុំថ្មពូន ស្រុកព្រៃឈរ ខេត្តកំពង់ចាម បានឲ្យដឹងថា ទីតាំងបញ្ជល់មាន់ បៀរ វង់អាប៉ោង តាមផ្លូវលំលេខ៣៨ជាប់ចម្ការស្វាយចន្ទី និងចម្ការចេក ដែលផ្អាកមួយរយៈពេលខ្លីនោះ ឥឡូវបើកដំណើរការយ៉ាងរលូន សមត្ថកិច្ច និងមន្ត្រីអាជ្ញាធរមូលដ្ឋាន ជាអ្នកបេីកភ្លើងខៀវ មិនបង្ក្រាបទុក្ខឲ្យលេងតាមអំពើចិត្ត។
ប្រជាពលរដ្ឋបានឲ្យដឹងទៀតថា នាយប៉ុស្តិ៍នគរបាលរដ្ឋបាលឃុំថ្មពូន ព្រមទាំងអធិការនគរបាលស្រុកព្រៃឈរ និងអភិបាលស្រុកព្រៃឈរ មិនចាត់វិធានការបង្ក្រាបល្បែងស៊ីសងដើម្បីពង្រឹងសន្តិសុខសង្គមនោះទេ។
ហេតុនេះហើយទើបប្រជាពលរដ្ឋអំពាវនាវឲ្យលោកឧត្ដមសេនីយ៍ទោ ឯម កុសល ស្នងការនគរបាលខេត្តកំពង់ចាម និងលោក អ៊ុន ចាន់ដា អភិបាលខេត្តកំពង់ចាម ចាត់វិធានការបង្ក្រាបល្បែងស៊ីសងក្នុងភូមិព្រៃស្វាយ ឃុំថ្មពូន ស្រុកព្រៃឈរ ជាបន្ទាន់។
មជ្ឈដ្ឋានខាងក្រៅ ÷ សង្ស័យថា មានការបើកដៃពីមន្ត្រីអាជ្ញាធរ និងសមត្ថកិច្ចមូលដ្ឋានទើបមេល្បែងស៊ីសងខុសច្បាប់ អាចបើកសង្វៀនបញ្ជល់មាន់ បៀរ និងវង់អាប៉ោងទ្រង់ទ្រាយធំ នៅក្នុងភូមិព្រៃស្វាយ ឃុំថ្មពូន ឡើងវិញយ៉ាងរលូនគ្មានញញើតអ្វីទាំងអស់។
ក្នុងមួយថ្ងៃៗមានអ្នកចូលរួមលេងល្បែងបញ្ជល់មាន់ និងវង់អាប៉ោងយ៉ាងគគ្រឹកគគ្រេង ធ្វើឲ្យមេល្បែងស៊ីសងអាចប្រមូលលុយពីក្រុមអ្នកញៀនល្បែងបានយ៉ាងច្រើន ព្រោះមានមន្ត្រីអាជ្ញាធរ និងសមត្ថកិច្ចមូលដ្ឋានថ្នាក់ឃុំ ថ្នាក់ស្រុករក្សាភាពស្ងៀមស្ងាត់។
ប្រការនេះបានធ្វើឲ្យប្រជាពលរដ្ឋព្រួយបារម្ភយ៉ាងខ្លាំងពីបញ្ហាអសន្តិសុខសង្គម ព្រោះអំពើចោរកម្ម អំពើហិង្សាក្នុងគ្រួសារ និងបទល្មើសផ្សេងៗកើតឡើងយ៉ាងរាលដាលគួរឲ្យភ័យខ្លាច។
តាមប្រភពខ្លះបានបង្ហើបឲ្យដឹងថា មេល្បែងស៊ីសងខុសច្បាប់ជាប្រភពចំណូលរបស់សមត្ថកិច្ចមូលដ្ឋាន ទើបនាយប៉ុស្តិ៍នគរបាលរដ្ឋបាលឃុំថ្មពូន និងអធិការនគរបាលស្រុកព្រៃឈរ មិនចាត់វិធានការបង្ក្រាបដើម្បីពង្រឹងសន្តិសុខសង្គមឲ្យស្របទៅតាមគោលនយោបាយភូមិ-ឃុំមានសុវត្ថិភាពទាំង៧ចំណុច។
ហេតុនេះលោក ឯម កុសល ស្នងការនគរបាលខេត្តកំពង់ចាម និងលោក អ៊ុន ចាន់ដា អភិបាលខេត្តកំពង់ចាម មិនគួរទុកឲ្យមន្ត្រីអាជ្ញាធរ និងសមត្ថកិច្ចក្នុងស្រុកព្រៃឈរ ធ្វើអ្វីៗស្រេចតែអំពើចិត្តតទៅទៀតនោះទេ។
ប្រជាពលរដ្ឋបានលើកឡើងថា ប្រហែលមេល្បែងស៊ីសងមានខ្នងបង្អែកក្រាស់ ទើបសង្វៀនបញ្ជល់មាន់ និងវង់អាប៉ោងនៅភូមិព្រៃស្វាយ ឃុំថ្មពូន ផ្អាកបានតែមួយរយៈពេលខ្លីហើយបើកដំណើរការឡើងវិញ។
