ក្រចេះ ÷ ប្រភពពីប្រជាពលរដ្ឋ រស់នៅខ្សែបន្ទាត់ព្រំដែន រវាង កម្ពុជាវៀតណាម បានបញ្ជាក់ឲ្យដឹងថា យប់ថ្ងៃទី២៣ ខែមេសា ឆ្នាំ២០២២ ឈ្មួញឈ្មោះ ថៃ គា ដឹកជញ្ជូនធ្យូងតាមប្រភេទ រថយន្តសាំយ៉ុងកែច្នៃ ៣គ្រឿង ចេញពីស្រុកស្នួល ឆ្លងច្រកតំបន់ត្រពាំងស្រែ ទៅលក់នៅស្រុកយួនយ៉ាងពេញបន្ទុក។
សកម្មភាពដឹកជញ្ជួនធ្យូង យ៉ាងគគ្រឹកគគ្រេង ទាំងយប់ទាំងថ្ងៃ របស់ឈ្មួញឈ្មោះ ថៃ គា គឺគ្មានសមត្ថកិច្ចមន្ត្រីជំនាញណាម្នាក់ ចាត់វិធានការទប់ស្កាត់ឡើយ ប្រហែលខ្លាចបាត់បង់លាភសក្ការៈ ទើបរក្សាភាពស្ងៀមស្ងាត់ មិនខ្វល់ពីអ្វីៗទាំងអស់។
ហេតុនេះ ហើយទើបប្រជាពលរដ្ឋអំពាវនាវឲ្យលោក សាន្ត ប៊ុនថាន មេបញ្ជាការកងរាជអាវុធហត្ថខេត្តក្រចេះ និងលោក វ៉ា ថន អភិបាលខេត្តក្រចេះ ពិនិត្យឡើងវិញខ្លះផង ចំពោះឈ្មួញឈ្មោះ ថៃ គា ដឹកជញ្ជូនធ្យូង តាមច្រកត្រពាំងស្រែទៅលក់នៅស្រុកយួន បានយ៉ាងរលូន។
ប្រភពពីប្រជាពលរដ្ឋ រស់នៅឃុំ២ធ្នូ ស្រុកស្នួល ខេត្តក្រចេះ បានឲ្យដឹងថា បច្ចុប្បន្នឈ្មួញឈ្មោះ ថៃ គា ដឹកជញ្ជូនធ្យូង ចេញពីស្រុកស្នួល ទៅស្រុកយួន តាមច្រកតំបន់ត្រពាំងស្រែ តាមអំពើចិត្ត ព្រោះគ្មានមន្ត្រីជំនាញ ឬសមត្ថកិច្ចណា ហ៊ានប៉ះពាល់ឡើយ។
មហាជន.! បានលើកឡើងចំៗថា បើគ្មានការឃុបឃិត បើកដៃពីសំណាក់មន្ត្រីជំនាញ មានសមត្ថកិច្ចពាក់ព័ន្ធ និង មេប៉ុស្តិ៍នៅប្រចាំច្រកតំបន់ត្រពាំងស្រែ ជាអ្នកបើកបារ៉ាស់ ឲ្យឈ្មួញឈ្មោះ ថៃ គា គឺមិនអាចដឹកជញ្ជូនធ្យូង ចេញទៅស្រុកយួនបាននោះទេ។
ប្រភពស្និទ្ធនឹងឈ្មួញឈ្មោះ ថៃ គា បានបង្ហើប ឲ្យដឹងទៀតថា ដោយសារមានខ្នងបង្អែករឹងមាំ ហើយមានការឃុបឃិតជាប្រព័ន្ធ ទើបឈ្មួញឈ្មោះ ថៃ គា អាចដឹកជញ្ជូនធ្យូង ពីស្រុកស្នួល ខេត្តក្រចេះ ចេញទៅស្រុកយួន តាមច្រកតំបន់ត្រពាំងស្រែ ឃុំ២ធ្នូ យ៉ាងរលូន។
មជ្ឈដ្ឋានខាងក្រៅបានរិះគន់! លោក ទ្រី សុភក្ដិ ប្រធានមន្ទីរកសិកម្មខេត្តក្រចេះ និង មេរដ្ឋបាលព្រៃឈើខេត្តក្រចេះ បណ្ដោយឲ្យឈ្មួញឈ្មោះ ថៃ គា ដឹកជញ្ជូនធ្យូងទៅស្រុកយួនតាមច្រកត្រពាំងស្រែ មិនចាត់វិធានការបង្ក្រាប ព្រោះខ្លាចបាត់បង់ចំណូលប្រចាំថ្ងៃ។
ជាងនេះទៅទៀតសូម្បីតែលោក សាន្ត ប៊ុនថាន មេបញ្ជាការកងរាជអាវុធហត្ថខេត្តក្រចេះ ព្រមទាំងលោក លន់ សុផាត ស្នងការនគរបាលខេត្តក្រចេះ និងលោក វ៉ា ថន អភិបាលខេត្តក្រចេះ សម្ងំស្ងាត់ឈឹង។
