ប្រភពពីក្រុមឈ្មួញ និងអាជីវករដែលនាំចូលបន្លែផ្លែឈើពីស្រុកយួន តាមច្រកត្រពាំងផ្លុង បានឲ្យដឹងថា សម្រាប់បន្លែផ្លែឈើ១រ៉ឺម៉ក ត្រូវបង់លុយចាប់ពី៥ម៉ឺនរៀល ទៅ៨ម៉ឺនរៀល រីឯរថយន្តសាំយ៉ុងត្រូវបង់ចាប់ពី១០ម៉ឺនរៀល ទៅ១២ម៉ឺនរៀលក្នុង១រថយន្ត ជាកំហិត។
ក្រុមឈ្មួញ និងអាជីវករបានបញ្ជាក់ថាលោក ស ថេន នាយប៉ុស្តិ៍នគរបាលអន្តោប្រវេសន៍ច្រកទ្វារអន្តរជាតិត្រពាំងផ្លុង គាបយកលុយពីពួកគាត់ដោយគ្មានការយោគយល់ឡើយ ហើយឈ្មួញធំៗអាចនាំចូលទំនិញគេចពន្ធ និងទំនិញបង់ពន្ធមិនគ្រប់តាមអំពើចិត្ត។
ហេតុនេះហើយទើបក្រុមឈ្មួញ និងអាជីវករអំពាវនាវឲ្យថ្នាក់ដឹកនាំក្រសួងមហាផ្ទៃ និងនាយឧត្ដមសេនីយ៍ គៀត ច័ន្ទថារិទ្ធ អគ្គនាយកនៃអគ្គនាយកដ្ឋានអន្តោប្រវេសន៍ ចាត់វិធានការទប់ស្កាត់អំពើពុករលួយ របស់លោក ស ថេន និងបក្ខពួកជាបន្ទាន់។
ប្រភពពីក្រុមឈ្មួញ និងអាជីវករ បន្តទៀតថា ទំនិញនាំចូលពីស្រុកយួន តាមច្រកទ្វារអន្តរជាតិត្រពាំងផ្លុង ស្រុកពញាក្រែក ខេត្តត្បូងឃ្មុំ បានឲ្យដឹងថា បច្ចុប្បន្នមុខរបរ របស់ពួកគាត់ប្រឈមនឹងការលំបាកកាន់តែខ្លាំងដោយសារសមត្ថកិច្ច គាបយកលុយលើតុក្រោមតុច្រើនពេក។
សព្វថ្ងៃ.! ឈ្មួញ និងអាជីវករបានអំពាវនាវឲ្យថ្នាក់ដឹកនាំក្រសួងមហាផ្ទៃ និងនាយឧត្ដមសេនីយ៍ គៀត ច័ន្ទថារិទ្ធ អគ្គនាយកនៃអគ្គនាយកដ្ឋានអន្តោប្រវេសន៍ ទប់ស្កាត់អំពើពុករលួយ របស់លោក ស ថេន នាយប៉ុស្តិ៍នគរបាលអន្តោប្រវេសន៍ច្រកទ្វារអន្តរជាតិត្រពាំងផ្លុង ខ្លះផង។
ដោយហេតុថាមួយរយៈចុងក្រោយនេះលោក ស ថេន និងបក្ខពួកអង្គុយចាំរាប់ក្បាលរថយន្តដឹកទំនិញពីស្រុកយួនយកលុយតាមអំពើចិត្ត ហើយគ្មានឈ្មួញ ឬអាជីវករណាហ៊ានតវ៉ាជាមួយលោក ស ថេន នោះទេ។
មន្ត្រីពាក់ព័ន្ធនៅច្រកទ្វារអន្តរជាតិត្រពាំងផ្លុង បានឲ្យដឹងថា ដោយសារអាងមានខ្នងបង្អែករឹងមាំនៅក្នុងអគ្គនាយកដ្ឋានអន្តោប្រវេសន៍ ទើបលោក ស ថេន ហ៊ានធ្វើអ្វីៗតាមអំពើចិត្ត ដោយគ្មានញញើតអ្វីទាំងអស់។
លោក ម៉ុន មាគា ស្នងការនគរបាលខេត្តត្បូងឃ្មុំ និងលោក ជាម ច័ន្ទសោភ័ណ អភិបាលខេត្តត្បូងឃ្មុំ មិនហ៊ានប៉ះពាល់លោក ស ថេន នាយប៉ុស្តិ៍នគរបាលអន្តោប្រវេសន៍ច្រកទ្វារអន្តរជាតិត្រពាំងផ្លុង នោះទេ ព្រោះដឹងថាលោក ស ថេន មានខ្នងបង្អែកក្រាស់។
បើទោះបីរឿងអាស្រូវ និងអំពើពុករលួយ របស់លោក ស ថេន ត្រូវបានលាតត្រដាងជាបន្តបន្ទាប់យ៉ាងណាក៏ដោយគឺលោក ម៉ុន មាគា ស្នងការនគរបាលខេត្តត្បូងឃ្មុំ និងលោក ជាម ច័ន្ទសោភ័ណ អភិបាលខេត្តត្បូងឃ្មុំ សម្ងំស្ងាត់ឈឹងតែម្ដង។
