ប្រភពពីមន្ត្រីនៅច្រកទ្វារអន្តរជាតិអូរយ៉ាដាវ ស្រុកអូយ៉ាដាវ ខេត្តរតនគិរី បានឲ្យដឹងថា រយៈពេល១សប្ដាហ៍ចុងក្រោយនេះឈ្មួញឈ្មោះ មករា បង្កើនសកម្មភាពដឹកជញ្ជូនឈើប្រណីតខុសច្បាប់ ទៅលក់ស្រុកយួនតាមច្រកទ្វារអន្តរជាតិអូរយ៉ាដាវ យ៉ាងពេញបន្ទុក អាជ្ញាធរពាក់ព័ន្ធធ្វើមិនដឹងឬទុកឲ្យឈ្មួញមករាដឹកជញ្ជូនទាំងយប់ទាំងថ្ងៃតាមអំពើចិត្ត។
ប្រភពបានឲ្យដឹងទៀតថា ឈ្មួញឈ្មោះ មករា ប្រើរថយន្តសាំយ៉ុង៨ ទៅ ១០ គ្រឿង ដើម្បីដឹកជញ្ជូនឈើប្រណីតខុសច្បាប់ ពីចំណុចភ្នំកុក មកស្តុកទុកផ្លូវចុះចំណោតជិតបឹងយក្សឡោម បន្តទៅលក់ស្រុកយួនពេញឡានដល់ដំបូល ហើយក្នុងមួយថ្ងៃៗ ដឹកជញ្ជូនឈើចេញទៅស្រុកយួន ពី៧ទៅ៨ជើង ឆ្លងកាត់មន្ត្រីមានសមត្ថកិច្ចពាក់ព័ន្ធទាំងអស់រហូតដល់ព្រំដែនចូលដល់យួនទាំងយប់ទាំងថ្ងៃយ៉ាងរលូន គ្មានមន្ត្រីជំនាញ ឬសមត្ថកិច្ចពាក់ព័ន្ធណាហ៊ានប៉ះពាល់ឡើយ។
លោក ថាវ យ៉េន មេបញ្ជាការកងរាជអាវុធហត្ថខេត្តរតនគិរី និងលោក ញ៉ែម សំអឿន អភិបាលខេត្តរតនគិរី បានរក្សាភាពស្ងៀមស្ងាត់បណ្ដោយឲ្យឈ្មួញឈ្មោះ មករា បង្កើនសកម្មភាពដឹកជញ្ជូនឈើខុសច្បាប់ទៅលក់ស្រុកយួន ដោយសេរី។
ប្រភពស្និទ្ធនឹងមេឈ្មួញឈ្មោះ មករា ដុះស្លែប្រចាំខេត្តរតនគិរី បានឲ្យដឹងថា ដោយសារមានការបើកដៃពីមន្ត្រីជំនាញ និងសមត្ថកិច្ចពាក់ព័ន្ធ ទើបមេឈ្មួញម្នាក់នេះ អាចដឹកជញ្ជូនឈើខុសច្បាប់ ចេញពីស្រុកវ៉ើនសៃ ចូលក្រុងបានលុង ហើយដឹកជញ្ជូនឈើខុសច្បាប់ពីក្រុងបានលុង ចេញទៅលក់ស្រុកយួនតាមច្រកទ្វារអន្តរជាតិអូរយ៉ាដាវ យ៉ាងពេញទំហឹង។
ជាងនេះទៅទៀតមេឈ្មួញឈ្មោះ មករា មានមន្ត្រីធំជាបង្អែកយ៉ាងរឹងមាំ ទើបមន្ត្រីជំនាញ និងសមត្ថកិច្ចពាក់ព័ន្ធក្នុងខេត្តរតនគិរី មិនហ៊ានប៉ះពាល់ទាល់តែសោះ ដោយទុកឲ្យឈ្មួញរូបនេះដឹកជញ្ជូនឈើចេញទៅលក់ស្រុកយួនកាន់តែខ្លាំងក្លាជាងមុន។
ប្រធានមន្ទីរកសិកម្មខេត្តរតនគិរី និងមេរដ្ឋបាលព្រៃឈើខេត្តរតនគិរី សម្ងំស្ងាត់ឈឹង ទោះបីឈ្មួញឈ្មោះ មករា ដឹកជញ្ជូនឈើទៅលក់ស្រុកយួន យ៉ាងពេញបន្ទុកក៏ដោយ។
មន្ត្រីពាក់ព័ន្ធនៅច្រកទ្វារអន្តរជាតិអូរយ៉ាដាវ បានឲ្យដឹងថា ប្រសិនបើគ្មានការបើកដៃពីលោក ខឹម ចិត្រា នាយប៉ុស្តិ៍នគរបាលអន្តោប្រវេសន៍ច្រកទ្វារអន្តរជាតិអូរយ៉ាដាវទេនោះ គឺឈ្មួញឈ្មោះ មករា មិនអាចដឹកជញ្ជូនឈើទៅស្រុកយួន បានឡើយ។
ហេតុនេះហើយទើបមានសេចក្ដីអំពាវនាវឲ្យថ្នាក់ដឹកនាំគណៈកម្មាជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិចាត់វិធានការបង្ក្រាបមេឈ្មួញឈ្មោះ មករា នៅក្នុងខេត្តរតនគិរី ជាបន្ទាន់។
ដោយសារថារយៈពេលមួយសប្ដាហ៍ចុងក្រោយនេះឈ្មួញឈ្មោះ មករា ដឹកជញ្ជូនឈើចេញទៅស្រុកយួនយ៉ាងគំហុក ។
