លោក ចាន់ តារា ប្រធានការិយាល័យគយច្រកទ្វារអន្តរជាតិព្រំដែនព្រៃវល្លិ៍ និងលោក ប៉ាង ឡេង នាយប៉ុស្តិ៍នគរបាលអន្តោប្រវេសន៍ ជាអ្នករួមដៃគ្នាអោយក្រុមឈ្មួញនាំទំនិញគ្រប់ប្រភេទ ពីស្រុកយួន ចូលមកខ្មែរតាមអំពើចិត្ត?

ស្វាយរៀង÷ សេចក្តីរាយការណ៍ ពីអាជីវករដែលធ្លាប់នាំទំនិញពីស្រុកយួន ចូលដីខ្មែរ បានបញ្ជាក់ឲ្យ រស្មីឯករាជ្យ ដឹងថា ចាប់តាំងពី លោក ចាន់ តារា មកកាន់តំណែង ជាមេគយច្រកទ្វារអន្តរជាតិព្រំដែនព្រៃវល្លិ៍ រហូតមកដល់បច្ចុប្បន្ន និងលោក ប៉ាង ឡេង នាយប៉ុស្តិ៍នគរបាលអន្តោប្រវេសន៍បានបេីកដៃឲ្យឈ្មួញទាំងធំទាំងតូច សម្រុកនាំគ្នាដឹកទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់ តាមច្រកមួយនេះ យ៉ាងគគ្រឹកគគ្រេងទាំងយប់ទាំងថ្ងៃ។

ប្រភពបន្តទៀតថា លោកចាន់ តារា មេគយច្រកទ្វារអន្តរជាតិព្រំដែនព្រៃវល្លិ៍ និងលោកប៉ាង ឡេងនាយប៉ុស្តិ៍នគរបាលអន្តោប្រវេសន៍ កំពុងត្រូវប៉ាន់ក្រុមឈ្មួញដឹកស្រូវ មកពីបណ្តាលខេត្តនាៗ យកទៅលក់ស្រុកយួន តាមច្រកនេះអង្គុយចាំរាប់ក្បាលរថយន្ត ក្នុងមួយថ្ងៃៗ មិនតិចគ្រឿងនោះទេ ជាពិសេសឈ្មួញតូចតាចរកសុី ដឹកទំនិញបន្តិចបន្ទួច ត្អូញត្អែរឲ្យដឹងថា ពួកគាត់បង់លុយតាមការកំណត់របស់ លោក ចាន់ តារា ទើបអាចជញ្ជូនទំនិញឆ្លងកាត់ ពីដីយួនចូលដីខ្មែរ បានសុខស្រួល។

ជាក់ស្តែងក្រុមឈ្មួញគ្រាក់ៗ ដែលរស់នៅ ឃុំថ្មី ស្រុកកំពង់រោទិ៍ ខេត្តស្វាយរៀង បានបង្ហើបឲ្យដឹងថា សកម្មភាពភាព ឈ្មួញនាំចូលទំនិញគេចពន្ធ ទំនិញបង់ពន្ធមិនគ្រប់ តាមរថយន្តសាន់យ៉ុង រថយន្តកូរ៉េ ដឹកបន្លែផ្លែឈើ និង រថយន្តកុងទីន័រដឹកគ្រឿងអេឡិចត្រូនិកគ្រប់ប្រភេទ និងទំនិញខុសច្បាប់ពីស្រុកយួនយ៉ាងគំហុក គឺជាប្រភពចំណូលដ៏សំខាន់របស់ លោកចាន់ តារា មេគយច្រកទ្វារអន្តរជាតិព្រំដែនព្រៃវល្លិ៍។

ដោយហេតុថា ប្រសិនបើឈ្មួញមិនបង់លុយលើតុក្រោមតុតាមការកំណត់របស់លោក ប៉ាង ឡេង ទេនោះ គឺមិនអាចដឹកជញ្ជូនទំនិញពីទឹកដីយួនចូលទឹកដីខ្មែរបានឡើយ ហើយគ្មានឈ្មួញណាហ៊ានតវ៉ាជាមួយលោក ប៉ាង ឡេង បានទេ។

អំពើពុករលួយរបស់លោក ប៉ាង ឡេង អាចប្រព្រឹត្តទៅយ៉ាងរលូន គឺដោយសារមានកិច្ចសហការជាមួយលោក ចាន់ តារា ប្រធានការិយាល័យគយច្រកទ្វារអន្តរជាតិព្រៃវល្លិ៍ ដែលកំពុងល្បីល្បាញខ្លាំង ខាងប្រព្រឹត្តអំពើពុករលួយ។

ប្រភពដែលស្និទ្ធនឹងលោក ប៉ាង ឡេង បានលើកឡើងថា ដោយសារអាងមានខ្នងបង្អែករឹងមាំដើម្បីជួយការពារនៅក្នុងអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ ទើបបុគ្គល ប៉ាង ឡេង ម្នាក់នេះហ៊ានប្រើតួនាទី និងអំណាចរបស់ខ្លួនកាងឈ្មួញនាំទំនិញចូលពីស្រុកយួនដើម្បីប្រមូលលុយតាមរបៀបពុករលួយយ៉ាងពេញបន្ទុក។

ហេតុនេះថ្នាក់ដឹកនាំក្រសួងមហាផ្ទៃ និងលោក គៀត ច័ន្ទថារិទ្ធ អគ្គនាយកនៃអគ្គនាយកដ្ឋានអន្តោប្រវេសន៍ មិនត្រូវបណ្តែតបណ្តោយរឿងនេះតទៅទៀតទេ ព្រោះរឿងអាស្រូវពុករលួយរបស់បុគ្គល ប៉ាង ឡេង នេះត្រូវបានលាតត្រដាងជាបន្តបន្ទាប់រួចទៅហើយ។

ប្រភពខ្លះទៀតបានបង្ហើបឲ្យដឹងថា ដោយសារអាងមានលោក គៀត ច័ន្ទថារិទ្ធ អគ្គនាយកនៃអគ្គនាយកដ្ឋានអន្តោប្រវេសន៍ ជាខ្នងបង្អែកការពារដ៏រឹងមាំនេះហើយទើបលោក ប៉ាង ឡេង នាយប៉ុស្តិ៍នគរបាលអន្តោប្រវេសន៍ច្រកទ្វារអន្តរជាតិព្រៃវល្លិ៍ មិនដែលញញើតអ្វីទាំងអស់ក្នុងការប្រព្រឹត្តអំពើពុករលួយយ៉ាងពេញទំហឹងដូចសព្វថ្ងៃ។