បើតាមប្រភពពី អង្គការក្រៅរដ្ឋាភិបាលឃ្លាំមើលបទល្មើសព្រៃឈើ ក្នុងខេត្តព្រះវិហារ កត់សម្គាល់ឃេីញថា ក្រុមហ៊ុនដោន បានកៀងគរ និងប្រមូលទិញឈើ ពីពលរដ្ឋស្ទើរគ្រប់ច្រកល្ហក ក្នុងភូមិសាស្ត្រ ស្រុកជាំក្សាន្ត ស្រុកគូលែន ស្រុកឆែប និងស្រុកជ័យសែន ដោយសេរី។
ជាហេតុនាំឱ្យពលរដ្ឋនៅតំបន់នោះ សម្រុកនាំគ្នា វេចបាយកញ្ចប់ កាន់ម៉ាស៊ីនត្រង់ស៊ីន័រគ្រប់ដៃ និងបើកគោយន្តចូលកាប់បំផ្លាញព្រៃឈើក្នុង ដែនជម្រកសត្វព្រៃគូលែនព្រហ្មទេព ព្រៃព្រះរកានិងព្រៃឡង់ លាន់សូរទ្រហឹងរំពងពេញព្រៃ ខណៈមន្ត្រីជំនាញពាក់ព័ន្ធ រក្សាភាពស្ងៀមស្ងាត់។
មិនតែប៉ុណ្ណោះ ក្រុមហ៊ុនដោន ក៏បានដាក់គ្រឿងចក្រធ្វើការឈូសឆាយ បើកផ្លូវ សម្រាប់ជាចរន្តដឹកជញ្ជូនព្រៃឈើ ចេញពី ដែនជម្រកសត្វព្រៃគូលែនព្រហ្មទេព កំពុងកៀងគរប្រជាពលរដ្ឋឱ្យ ចូលកាប់ឈើប្រភេទលេខ១ ឈ្លីក ឃ្លុំ បានយ៉ាងសុខស្រួលបំផុត ប្រហែលជាម្ចាស់ក្រុមហ៊ុនសែនព្រេនត្រូវរ៉ូវ ទេីបសមត្ថកិច្ចពាក់ព័ន្ធ មិនចាត់វិធានការបង្ក្រាប។
ដោយដឹកជញ្ជូនតាមគោយន្តកន្ត្រៃ មកកាន់ ចំណុចក្បែរទីបញ្ជាការកងពលតូចលេខ៩ ស្ថិតក្នុងភូមិរុងរឿង១ ឃុំទឹកក្រហម ស្រុកជាំក្សាន្ត និងបន្តដឹកតាមរថយន្តសាំយ៉ុងឆ្ពោះទៅ ក្រុមហ៊ុនដោន ស្ថិតក្នុងភូមិពាក់ស្បែក ឃុំកន្ទួត ស្រុកជាំក្សាន្ត ខេត្តព្រះវិហារ។
ក្រុមឈ្មួញកំពុងលើកដាក់តាមប្រភេទ រថយន្តវេអង យកទៅលក់ផ្គត់ផ្គង់ទីផ្សារងងឹត និងចែកចាយបន្តតាមបណ្ដារាជធានីខេត្ត រាល់ការចោទប្រកាន់ខាងលើ នៅរសៀលថ្ងៃ១១ ខែ០១ ២០២២ បានព្យាយាមសុំការបកស្រាយ ពីលោក នួន សុខុម នាយខ័ណ្ឌរដ្ឋបាលព្រៃឈើខេត្តព្រះវិហារ ប៉ុន្តែទូរស័ព្ទចូលច្រើនដងហើយគ្មានអ្នកទទួល។
ចំពោះលោក ពឹង ទ្រីដា ប្រធានមន្ទីរកសិកម្មរុក្ខាប្រមាញ់និងនេសាទខេត្តព្រះវិហារ ក៍ពុំអាចសុំការបំភ្លឺបានដែរ ខណៈលោកទទួលទូរស័ព្ទហើយ ពេលឮសំនួរពីអ្នកសារព័ត៌មាន លោកថាស្ដាប់មិនច្បាស់រួចក៍ចុចបិទទូរស័ព្ទ។
ប៉ុន្តែលោក មាស ញឹម អនុប្រធានមន្ទីរបរិស្ថានខេត្តព្រះវិហារ និងជានាយក ដែនជម្រកសត្វព្រៃគូលែនព្រហ្មទេពបានថ្លែងប្រាប់ថា ក្រុមហ៊ុនដោន កន្លងមកត្រូវបានបិទហើយ លោកបន្តថារាល់សកម្មភាពកាប់ព្រៃឈើ និងដឹកជញ្ជួនព្រៃឈើគឺជារឿងខុសច្បាប់ទាំងអស់ចំពោះសំនួររឿង ក្រុមហ៊ុនដោន ធ្វើផ្លូវចូលដែនជម្រកសត្វព្រៃគូលែនព្រហ្មទេព ដើម្បីដឹកឈើនោះយ៉ាងម៉េចវិញ ។
លោក មាស ញឹម បានបដិសេធថា មិនមានការធ្វើផ្លូវចូល ដែនជម្រកសត្វព្រៃគូលែនព្រហ្មទេពនោះទេ ពោលគឺក្រុមហ៊ុនធ្វើផ្លូវនៅលើដីក្រុមហ៊ុន ចាស់ប៉ុណ្ណោះ។
មជ្ឈដ្ឋានខាងក្រៅទាមទារឱ្យ នាយឧត្ដមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស និងជាប្រធានគណៈកម្មការជាតិ ដើម្បីទប់ស្កាត់និងបង្ក្រាបបទល្មើសធនធានធម្មជាតិ
មេត្តាចាត់វិធានការទប់ស្កាត់និងបង្ក្រាប នូវរាល់សកម្មភាពខាងលើ ដើម្បីការពារធនធានធម្មជាតិ បើមិនដូច្នោះទេព្រៃឈើត្រូវវិនាសអស់ ក្រោមស្នាដៃ ក្រុមហ៊ុនដោន ជាក់ជាពុំខាន់ឡើយ៕
