សេចក្តីរាយការណ៍ ពីមន្ត្រីនៅច្រកអូរយ៉ាដាវ បានឲ្យដឹងថា កាលពីថ្ងៃទី២៩ ខែធ្នូ ឆ្នាំ២០២១ ឈ្មួញឈ្មោះ មករា ដឹកជញ្ជូនឈើចេញទៅស្រុកយួនតាមច្រកអូរយ៉ាដាវ ចំនួន៧រថយន្តសាំយ៉ុង ហើយនៅថ្ងៃទី៣០ ខែធ្នូ ឆ្នាំ២០២១ ចំនួន៥រថយន្តសាំយ៉ុង និងនៅថ្ងៃទី៣១ ខែធ្នូ ឆ្នាំ២០២១ ចំនួន៦រថយន្តសាំយ៉ុង។
ថ្ងៃបន្ទាប់មកទៀតលោក កែវ តាយ នាយរងប៉ុស្តិ៍នគរបាលអន្តោប្រវេសន៍ច្រកទ្វារអន្តរជាតិអូរយ៉ាដាវ នៅតែបើកបារ៉ាស់ឲ្យឈ្មួញឈ្មោះ មករា និងបក្ខពួកបន្តសកម្មភាពដឹកជញ្ជូនឈើទៅស្រុកយួនយ៉ាងរលូន ព្រោះអាងមានខ្នងបង្អែករឹងមាំ ។
រីឯលោក ថាវ យ៉ាន មេបញ្ជាការកងរាជអាវុធហត្ថខេត្តរតនគិរី និងលោក យិន ចំណាន ស្នងការនគរបាលខេត្តរតនគិរី បានរក្សាភាពស្ងៀមស្ងាត់ ធ្វើមិនដឹងមិនឮអ្វីទាំងអស់។
តាមប្រភពពីមន្ត្រីនៅច្រកទ្វារអន្តរជាតិអូរយ៉ាដាវ ស្រុកអូរយ៉ាដាវ ខេត្តរតនគិរី បានឲ្យដឹងថា ចាប់តាំងពីថ្ងៃទី២៩ ខែធ្នូ ឆ្នាំ២០២១ រហូតមកដល់ពេលនេះ លោកវរសេនីយ៍ឯក កែវ តាយ នាយរងប៉ុស្តិ៍នគរបាលអន្តោប្រវេសន៍ច្រកទ្វារអន្តរជាតិអូរយ៉ាដាវ បើកដៃឲ្យឈ្មួញឈ្មោះ មករា ដឹកជញ្ជូនឈើប្រណីតចេញទៅស្រុកយ៉ាងពេញបន្ទុក។
ចំណែកលោកវរសេនីយ៍ឯក ឃឹម ចិត្រា នាយប៉ុស្តិ៍នគរបាលអន្តោប្រវេសន៍ច្រកទ្វារអន្តរជាតិអូរយ៉ាដាវ បានរក្សាភាពស្ងៀមស្ងាត់ទុកឲ្យលោក កែវ តាយ ធ្វើអ្វីៗតាមអំពើចិត្ត មិនខ្វល់ពីការរិះគន់អ្វីទាំងអស់។
ដូច្នេះទើបឈ្មួញជើងចាស់ឈ្មោះ មករា និងបក្ខពួកសម្រុកដឹកជញ្ជូនឈើប្រណីចេញទៅស្រុកយួនយ៉ាងរលូន ព្រោះមានការឃុបឃិតជាប្រព័ន្ធ ពីសមត្ថកិច្ចប្រចាំនៅច្រកទ្វារអន្តរជាតិអូរយ៉ាដាវ។
ជុំវិញបញ្ហាខាងលើនេះមានសេចក្តីអំពាវនាវឲ្យថ្នាក់ដឹកនាំគណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ ចាត់វិធានការទប់ស្កាត់ជាបន្ទាន់ ព្រោះសមត្ថកិច្ចនៅច្រកទ្វារអន្តរជាតិអូរយ៉ាដាវ បើកបារ៉ាស់ឲ្យឈ្មួញឈ្មោះ មករា និងបក្ខពួកដឹកជញ្ជូនឈើប្រណីត ចេញទៅស្រុកយួនដោយរលូន។
ជាងនេះទៅទៀតតាមប្រភពខ្លះបានឲ្យដឹងថា លោក ខឹម ចិត្រា និងលោក កែវ តាយ អាងមានខ្នងបង្អែករឹងមាំនៅក្នុងអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ ទើបហ៊ានបើកបារ៉ាស់ឲ្យឈ្មួញដឹកជញ្ជូនឈើទៅស្រុកយួន។
ដូច្នេះថ្នាក់ដឹកនាំក្រសួងមហាផ្ទៃ និងនាយឧត្តមសេនីយ៍ គៀត ច័ន្ទថារិទ្ធ អគ្គនាយកនៃអគ្គនាយកដ្ឋានអន្តោប្រវេសន៍ មិនគួរមើលរំលង។
