ប្រភពពីមន្ត្រីអាជ្ញាធរ និងសមត្ថកិច្ចមូលដ្ឋានក្នុងភូមិកក់ ស្រុកពញាក្រែក បានឲ្យដឹងថា បុគ្គលឈ្មោះ ហាន មានខ្នងបង្អែកដែលមានឥទ្ធិពលគ្របសង្កត់ទៅលើលោក ម៉ុន មាគ៌ា ស្នងការនគរបាលខេត្តត្បូងឃ្មុំ ក៏ដូចជាលោក ជាម ច័ន្ទសោភ័ណ អភិបាលខេត្តត្បូងឃ្មុំ ទៀតផងទើបអាចធ្វើអ្វីៗបានតាមទំនើងចិត្ត។
ជាងនេះទៅទៀតតាមប្រភពខ្លះបានបង្ហើបឲ្យដឹងទៀតថា មានសមត្ថកិច្ចនិងមន្ត្រីធំៗក្នុងខេត្តត្បូងឃ្មុំ មួយចំនួនទទួលបានផលប្រយោជន៍ពីបុគ្គលឈ្មោះ ហាន ទើបមេល្បែងស៊ីសងម្នាក់នេះអាចបើកសង្វៀនបញ្ជល់មាន់ វង់បៀអាប៉ោង ក្នុងទីតាំងកាស៊ីណូចក្រវាល យ៉ាងពេញទំហឹង។
ប្រសិនបើគ្មានការឃុបឃិតគ្នាជាប្រព័ន្ធ ហើយគ្មានខ្នងបង្អែករឹងមាំទេនោះ គឺបុគ្គលឈ្មោះ ហាន មិនអាចសាងភាពល្បីល្បាញខាងបើកល្បែងស៊ីសងនៅលើទឹកដីខេត្តត្បូងឃ្មុំ បានដូចសព្វថ្ងៃនេះទេ។
ប្រភពព័ត៌មានពីប្រជាពលរដ្ឋនៅភូមិអន្លង់ជ្រៃ ឃុំកក់ ស្រុកពញាក្រែក ខេត្តត្បូងឃ្មុំ បានឲ្យដឹងថា បុគ្គលម្នាក់ឈ្មោះ ហាន បានបើកសង្វៀនបញ្ជល់មាន់ និងវង់បៀអាប៉ោង ក្នុងទីតាំងកាស៊ីណូចក្រវាល គឺនៅក្នុងចម្ការកៅស៊ូ ភូមិអន្លង់ជ្រៃ ឃុំកក់ ស្រុកពញាក្រែក ហើយកំពុងដំណើរការយ៉ាងពេញបន្ទុក។
ប្រភពបានឲ្យដឹងទៀតថា នៅទីតាំងបើកលេងល្បែងស៊ីសងរបស់បុគ្គលឈ្មោះ ហាន បើកឲ្យប្រពលរដ្ឋខ្មែរចូលលេងល្បែងយ៉ាងពពាក់ពពូន មិនខ្លាចឆ្លងជំងឺកូវីដ-១៩ នោះទេព្រោះបុគ្គលនេះអាងមានខ្នងបង្អែកដ៏រឹងមាំ។
ចំណែកមន្ត្រីអាជ្ញាធរ និងសមត្ថកិច្ចថ្នាក់ស្រុកថ្នាក់ខេត្តបានរក្សាភាពស្ងៀមស្ងាត់បណ្តោយឲ្យបុគ្គលឈ្មោះ ហាន ធ្វើអ្វីៗតាមអំពើចិត្តដែលជាហេតុធ្វើឲ្យប្រជាពលរដ្ឋនៅឃុំកក់ ស្រុកពញាក្រែក មានសេចក្តីព្រួយបារម្ភយ៉ាងខ្លាំងពីសេចក្តីអសន្តិសុខសង្គម។
ប្រជាពលរដ្ឋបានធ្វើការអំពាវនាវឲ្យថ្នាក់ដឹកនាំនៃក្រសួងមហាផ្ទៃជា ពិសេសនាយឧត្តមសេនីយ៍ នេត សាវឿន អគ្គស្នងការនគរបាលជាតិ ចាត់វិធានការទប់ស្កាត់ទង្វើមិនប្រក្រតីរបស់បុគ្គលឈ្មោះ ហាន ដែលជាមេបនល្បែងស៊ីសងនៅកាស៊ីណូចក្រវាល ក្នុងភូមិអន្លង់ជ្រៃ ឃុំកក់ ស្រុកពញាក្រែក ខេត្តត្បូងឃ្មុំ ជាបន្ទាន់។
ដោយហេតុថា បុគ្គលឈ្មោះ ហាន មិនត្រឹមតែបើកលេងល្បែងបញ្ជល់មាន់ បៀអាប៉ោង និងល្បែងផ្សេងៗទៀតក្នុងទីតាំងកាស៊ីណូចក្រវាល ប៉ុណ្ណោះទេគឺបុគ្គលនេះមានជំនាញខាងរត់ការណ៍បើកសង្វៀនបញ្ជល់មាន់ពាសពេញទឹកដីខេត្តត្បូងឃ្មុំ ទៀតផង។
អ្វីដែលគួរឲ្យកត់សម្គាល់គឺលោក ជាម ច័ន្ទសោភ័ណ អភិបាលខេត្តត្បូងឃ្មុំ និងលោក ម៉ុន មាគ៌ា ស្នងការនគរបាលខេត្តត្បូងឃ្មុំ បណ្តោយឲ្យបុគ្គលឈ្មោះ ហាន ធ្វើអ្វីៗតាមអំពើចិត្តមិនខ្វល់ពីផលប៉ះពាល់ដល់សន្តិសុខសង្គមនោះឡើយ។
