តាមប្រភពពីមន្ត្រីអាជ្ញាធរ និងសមត្ថកិច្ចមូលដ្ឋានក្នុងឃុំដូង ស្រុករមាសហែក ខេត្តស្វាយរៀង បានឲ្យដឹងថា ក្នុងមួយ ថ្ងៃៗមានរថយន្តតូចធំ រ៉ឺម៉កម៉ូតូនិងគោយន្តកែច្នៃ ដឹកជញ្ជូនទំនិញពីស្រុក យួនចូលតាមច្រក ទ្វារតំបន់ ដូង ចាប់ ពី២០០គ្រឿង ដល់៣០០គ្រឿង ដូច្នេះសមត្ថកិច្ច ប្រចាំច្រកនេះអាច ប្រមូលលុយតាមរ បៀបពុករលួយ បានយ៉ាង ច្រើន ។
ប្រភពបានឲ្យ ដឹងទៀតថា លោក វណ្ណា នាយប៉ុស្ដិ៍ការពារ ព្រំដែនច្រកដូង គឺជា អ្នកប្រមូលលុយ ពីក្រុមអា ជីវករ និងឈ្មួញដែលនាំចូលទំនិញពីស្រុកយួនយ៉ាងគឃ្លើន ហើយក៏មានការបែងចែកផលប្រយោជន៍ទៅថ្នាក់លើជាប្រចាំផងដែរ ទើបអ្វីៗអាចប្រព្រឹត្តទៅដោយរលូន។ អំពើពុករលួយរបស់លោក វណ្ណា នាយប៉ុស្ដិ៍ការពារព្រំដែនច្រកដូង កំពុងធ្វើឲ្យក្រុមអាជីវករនិងប្រជាពលរដ្ឋរិះគន់យ៉ាងខ្លាំងព្រោះយូរៗទៅពួកគាត់រកស៊ីចិញ្ចឹមតែមន្ត្រីពុករលួយ ហើយនៅសល់កម្រៃតិចតួចបំផុតសម្រាប់ដោះស្រាយជីវភាពធ្វើស្រែ។
ដូច្នេះហើយទើបមានការអំពាវនាវឲ្យលោក កឹង ឃន ស្នងការនគរបាលខេត្តស្វាយរៀង និងលោក ម៉ែន វិបុល អភិបាលខេត្តស្វាយរៀង មិនគួរបណ្ដែតបណ្ដោយឲ្យក្រុមសមត្ថកិច្ចនៅច្រកដូង ប្រព្រឹត្តអំពើពុករលួយយ៉ាងពេញបន្ទុកតទៅទៀតទេ។
ដោយហេតុថា ក្រុមអាជីវករនិងប្រជាពលរដ្ឋខំប្រឹងបញ្ចេញកម្លាំងញើសឈាមរកស៊ីទាំងលំបាកលំបិន ហើយសមត្ថកិច្ចនៅច្រកទ្វារតំបន់ដូងបែរជាមានសិទ្ធិអំណាចធំធេងក្នុងការប្រមូលលុយមួយថ្ងៃៗរាប់សិបលានរៀលយកទៅចែកគ្នាធ្វើមានធ្វើបានយ៉ាង។
ប្រភពពីក្រុមអាជីវករនិងពលរដ្ឋដែលនាំចូលទំនិញច្រើនប្រភេទដូចជា ជ្រូករស់ គ្រឿងទេស និងបន្លែបង្ការ ផ្លែឈើ សម្ភារៈប្រើប្រាស់ពីទឹកដីយួនចូលទឹកដីខ្មែរតាមច្រកទ្វារតំបន់ដូង ឃុំដូង ស្រុករមាសហែក បានឲ្យដឹងថា មុខរបររបស់ពួកគាត់នៅសល់កម្រៃតិចតួចបំផុត។
ដោយហេតុថា សមត្ថកិច្ចច្រកដូង ជាពិសេសគឺច្រកទ្វារតំបន់ដូង គាបយកលុយពីពួកគាត់តាមអំពើចិត្តដោយគ្មានការយោគយល់ឡើយ ហើយបើនរណាហ៊ានតវ៉ានោះត្រូវគេគំរាមកំហែងសព្វបែបយ៉ាង។
ពលរដ្ឋមួយចំនួនដែលរកស៊ីដឹកធុងជ័រតាមរ៉ឺម៉កម៉ូតូពីស្រុកយួនចូលទឹកដីខ្មែរតាមច្រកទ្វារតំបន់ដូង បានឲ្យដឹងថា ក្នុងមួយជើងពួកគាត់បង់លុយឲ្យក្រុមសមត្ថកិច្ចនៅច្រកនេះសរុបប្រមាណ១៣ម៉ឺនរៀល ហើយមិនទទួលបានបង្កាន់ដៃបង់ប្រាក់ឬវិក្កយបត្រត្រឹមត្រូវនោះឡើយ។
ប្រភពពីក្រុមអាជីវករមួយចំនួនបានឲ្យដឹងថា នៅពេលពួកគាត់នាំចូលទំនិញផ្សេងៗដឹកតាមរថយន្តកូរ៉េចំណុះ១តោនកន្លះតាមច្រកដូង គឺត្រូវបង់លុយ១៥ម៉ឺនរៀល ហើយអ្នករកស៊ីដឹកពូកតាមរ៉ឺម៉កក្នុងមួយជើងក៏ត្រូវបង់ចំនួន៨ម៉ឺនរៀលឬ២០ដុល្លារផងដែរ។
ប្រភពបានឲ្យដឹងទៀតថា អ្នករកស៊ីនាំចូលគ្រឿងទេស សម្ភារៈប្រើប្រាស់ គ្រឿងជ័រ កៅអី បន្លែផ្លែឈើ ត្រូវបង់ក្នុងមួយជើងពី១៥ម៉ឺនរៀលរហូតដល់៤០ម៉ឺនរៀលតាមរថយន្តតូចឬធំ ហើយការកំណត់ស្ថិតនៅលើបបូរមាត់របស់ក្រុមសមត្ថកិច្ច។ សូម្បីតែពលរដ្ឋខ្មែរដែលដឹកស្រូវ ដឹកដំឡូងមី ចេញទៅស្រុកយួនតាមច្រកតំបន់ដូង ក៏ត្រូវបង់លុយឲ្យសមត្ថកិច្ចតាមការកំណត់ដែរ ហេតុនេះហើយទើបប្រជាពលរដ្ឋអំពាវនាវឲ្យលោក ម៉ែន វិបុល អភិបាលខេត្តស្វាយរៀង ចាត់វិធានការទប់ស្កាត់អំពើពុករលួយរបស់ក្រុមសមត្ថកិច្ចប្រចាំច្រកដូង ស្រុករមាសហែក ជាបន្ទាន់ដើម្បីកុំឲ្យពួកគេធ្វើអ្វីៗស្រេចតែអំពើចិត្តទៀត ៕
