ប្រភពពីប្រជាពលរដ្ឋក្នុងស្រុកព្រែកប្រសព្វ និងស្រុកសំបូរ ខេត្តក្រចេះ បានឲ្យដឹងថា ក្រុមឈ្មួញនៅតែអាចកាប់ឈើដឹកជញ្ជូនឈើចេញពីតំបន់ព្រៃឡង់ នៃស្រុកទាំងនេះយ៉ាងរលូនព្រោះមានការឃុបឃិតជាប្រព័ន្ធ។
សមត្ថកិច្ចអាវុធហត្ថស្រុកសំបូរ និងស្រុកព្រែកប្រសព្វ ក្រោមការគ្រប់គ្រងរបស់លោក សាន្ត ប៊ុនថាន មេបញ្ជាការកងរាជអាវុធហត្ថខេត្តក្រចេះ រងការរិះគន់ថា បង្ក្រាបតែឈ្មួញដែលមិនបង់លុយតាមការកំណត់។
សម្រាប់ឈ្មួញដែលចេះបែងចែកផលប្រយោជន៍ដល់មន្ត្រីជំនាញនិងសមត្ថកិច្ចពាក់ព័ន្ធអាចដឹកជញ្ជូនឈើពីស្រុកព្រែកប្រសព្វ ស្រុកសំបូរ ខេត្តក្រចេះ ចូលទៅខេត្តកំពង់ចាម និងខេត្តត្បូងឃ្មុំ ។
ប្រភពពីមន្ត្រីអង្គការក្រៅរដ្ឋាភិបាលដែលឃ្លាំមើលបទល្មើសព្រៃឈើក្នុងខេត្តក្រចេះ បានឲ្យដឹងថា ចាប់តាំងពីថ្ងៃទី០១ដល់ថ្ងៃទី០៩ ខែតុលា ឆ្នាំ២០២១ បទល្មើសព្រៃឈើក្នុងស្រុកចិត្របុរី និងស្រុកស្នួល នៅតែកើតឡើងយ៉ាងគំហុក។
ប្រភពបានឲ្យដឹងថា ករណីសមត្ថកិច្ចបង្ក្រាបបទល្មើសព្រៃឈើនៅស្រុកចិត្របុរី ជាបន្តបន្ទាប់កន្លងទៅនេះបានត្រឹមតែធ្វើឲ្យល្អមើលព្រោះឈ្មួញម្ចាស់ឈើម្ចាស់គោយន្ត ម្ចាស់រថយន្តនៅតែគេចផុតពីសំណាញ់ច្បាប់យ៉ាងរលូន។
ប្រការនេះបានធ្វើឲ្យវិធានការរបស់លោក សាន្ត ប៊ុនថាន មេបញ្ជាការកងរាជអាវុធហត្ថខេត្តក្រចេះ ក្នុងបង្ក្រាបបទល្មើសព្រៃក្លាយទៅជារឿងឥតន័យព្រោះបទល្មើសនៅតែកើតឡើងពេញបន្ទុកគ្មានទីបញ្ចប់។
ប្រភពពីប្រជាពលរដ្ឋនៅឃុំក្រញូងសែនជ័យ ស្រុកស្នួល ខេត្តក្រចេះ បានឲ្យដឹងថា មួយរយៈចុងក្រោយនេះឈ្មួញឈ្មោះម៉ែអាស្រួច ឈ្មួញឈ្មោះ ហួង និងឈ្មួញច្រើននាក់ទៀតដឹកជញ្ជូនឈើពីតំបន់ដែនជម្រកសត្វព្រៃភ្នំព្រេច តំបន់ដែនជម្រកសត្វព្រៃកែវសីមា ឆ្លងកាត់ស្រុកស្នួលខេត្តក្រចេះ ចូលទៅស្រុកមេមត់ ខេត្តត្បូងឃ្មុំ យ៉ាងសុខស្រួលបំផុត។
សមត្ថកិច្ចអាវុធហត្ថ សមត្ថកិច្ចនគរបាលនិងមន្ត្រីរដ្ឋបាលព្រៃឈើក្នុងស្រុកស្នួល មិនចាត់វិធានការបង្ក្រាបក្រុមឈ្មួញដឹកជញ្ជូនឈើខុសច្បាប់នោះទេ។
ជាងនេះទៅទៀតលោក ទ្រី សុភក្តិ ប្រធានមន្ទីរកសិកម្មខេត្តក្រចេះ និងលោក នួន ពៅ រតនា មេរដ្ឋបាលព្រៃឈើខេត្តក្រចេះ បណ្តោយឲ្យក្រុមឈ្មួញដឹកជញ្ជូនឈើខុស ច្បាប់យ៉ាងអនាធិបតេយ្យ។
