កំពង់ចាម ÷ ប្រភពពីប្រជាពលរដ្ឋក្នុងឃុំស្វាយពោធិ៍ ស្រុកស្រីសន្ធរ ខេត្តកំពង់ចាម បានឲ្យដឹងថា ក្នុងមូលដ្ឋានពួកគាត់មានល្បែងស៊ីសងខុសច្បាប់កើតឡើងយ៉ាងពេញបន្ទុកធ្វើឲ្យប៉ះពាល់យ៉ាងខ្លាំងដល់សន្តិសុខសង្គម។
ប្រជាពលរដ្ឋ បានអំពាវនាវឲ្យលោក ឯម កុសល ស្នងការនគរបាលខេត្តកំពង់ចាម និងលោក អ៊ុន ចាន់ដា អភិបាលខេត្តកំពង់ចាម ចាត់វិធានការបង្ក្រាបល្បែងស៊ីសងក្នុងមូលដ្ឋានពួកគាត់ប្រកបដោយប្រសិទ្ធភាព។
ដោយហេតុថា នាយប៉ុស្តិ៍នគរបាលរដ្ឋបាលឃុំស្វាយពោធិ៍ និងលោក សុខ យ៉េន អធិការនគរបាលស្រុកស្រីសន្ធរ មិនចាត់វិធានការបង្ក្រាបល្បែងស៊ីសងខុសច្បាប់នោះទេ។
សេចក្តីរាយការណ៍ពីប្រជាពលរដ្ឋក្នុងភូមិទាហ៊ា ឃុំស្វាយពោធិ៍ បានឲ្យដឹងថា ក្នុងមូលដ្ឋានពួកគាត់មានគេបើកសង្វៀនបញ្ជល់មាន់និងវង់អាប៉ោងទ្រង់ទ្រាយធំដំណើរការយ៉ាងរលូន។
ក្នុងមួយថ្ងៃៗមានអ្នកចូលរួមលេងល្បែងស៊ីសងយ៉ាងពពាក់ពពូន ចាញ់ឈ្នះលុយរាប់លានរៀល រាប់ពាន់រាប់ម៉ឺនដុល្លារ ដោយមិនខ្លាចឆ្លងជំងឺកូវីដ-១៩ នោះទេ។ ជាពិសេសមេឃុំស្វាយពោធិ៍ ព្រមទាំងនាយប៉ុស្តិ៍នគរបាលឃុំស្វាយពោធា៍ និងលោក សុខ យ៉េន អធិការនគរបាលស្រុកស្រីសន្ធរ សម្ងំស្ងាត់ឈឹង។
មជ្ឈដ្ឋាននានាបានដកសម្គាល់ថា នៅក្នុងស្រុកស្រីសន្ធរ បច្ចុប្បន្នល្បែងស៊ីសងខុសច្បាប់រាលដាលពេញបន្ទុកពីឃុំមួយទៅឃុំមួយ ហើយការបង្ក្រាបនាពេលកន្លងមកបានត្រឹមតែធ្វើឲ្យល្អមើលព្រោះអ្នកបើកល្បែងស៊ីសងតែងគេចផុតពីវិធានការផ្លូវច្បាប់។
ហេតុនេះហើយទើបប្រជាពលរដ្ឋអំពាវនាវលោក ឯម កុសល ស្នងការនគរបាលខេត្តកំពង់ចាម និងលោក អ៊ុន ចាន់ដា អភិបាលខេត្តកំពង់ចាម ចាត់វិធានការបង្ក្រាបល្បែងស៊ីសងខុសច្បាប់ប្រកបដោយប្រសិទ្ធភាពដើម្បីពង្រឹងសន្តិសុខសង្គម។
