ប្រភពស្និទ្ធនឹងឈ្មួញឈ្មោះ កោះ សំភី ហៅតាហយ បានឲ្យដឹងថា បើគ្មានការបើកដៃពីមន្ត្រីបរិស្ថានក្នុងតំបន់ដែនជម្រកសត្វព្រៃភ្នំឱរ៉ាល់ ទេនោះគឺឈ្មួញរូបនេះមិនអាចកាប់ឈើនិងប្រើប្រាស់រថយន្តជាច្រើនគ្រឿងដឹកជញ្ជូនឈើចេញពីព្រៃបានឡើយ។
ទាល់តែមានការឃុបឃិតជាប្រព័ន្ធទើបឈ្មួញឈ្មោះ កោះ សំភី ហៅតាហយ អាចកាប់ឈើនិងប្រើប្រាស់រថយន្តម៉ាកបង្កុង ជាច្រើនគ្រឿងដឹកជញ្ជូនឈើចេញពីព្រៃ យកមករក្សាទុកក្នុងភូមិបំណក់ ឃុំឈើតុំ ស្រុកក្រគរ យ៉ាងពេញបន្ទុក។
ទន្ទឹមនឹងនេះលោក ឡាយ វិសិដ្ឋ ប្រធានមន្ទីរកសិកម្មខេត្តពោធិ៍សាត់ និងមេរដ្ឋបាលព្រៃឈើខេត្តពោធិ៍សាត់ ក៏មិនហ៊ានប៉ះពាល់ឈ្មួញឈ្មោះ កោះ សំភី ហៅតាហយ ជាមន្ត្រីយោធានោះដែរ។
ប្រជាពលរដ្ឋនៅក្នុងឃុំឈើតុំ ស្រុកក្រគរ ខេត្តពោធិ៍សាត់ បានឲ្យដឹងថា បច្ចុប្បន្នឈ្មួញឈ្មោះ កោះ សំភី ហៅតាហយ នៅតែធ្វើសកម្មភាពកាប់ឈើដឹកជញ្ជូនចេញពីតំបន់ដែនជម្រកសត្វព្រៃភ្នំឱរ៉ាល់ ចូលមកទីតាំងរក្សាទុកឈើរបស់ខ្លួនក្នុងភូមិបំណក់ ឃុំឈើតុំ ស្រុកក្រគរ យ៉ាងពេញបន្ទុកដដែល។
ប្រភពខ្លះបានឲ្យដឹងថា បើគ្មានការបើកដៃពីមន្ត្រីបរិស្ថាន ប្រចាំតំបន់ដែនជម្រកសត្វព្រៃភ្នំឱរ៉ាល់ ស្រុកភ្នំក្រវាញ ទេនោះគឺឈ្មួញឈ្មោះ កោះ សំភី ហៅតាហយ ដែលជាមន្ត្រីយោធា មិនអាចប្រព្រឹត្តបទល្មើសព្រៃឈើតាមអំពើចិត្តឡើយ។
រីឯលោក ម៉ៅ ធនិន អភិបាលខេត្តពោធិ៍សាត់ និងលោក គង់ ពុទ្ធីរ៉ា ប្រធានមន្ទីរបរិស្ថានខេត្តពោធិ៍សាត់ ដែលចូលកាន់តំណែងជំនួសលោក ប៉ាន់ មរកត មិនចាត់វិធានការទប់ស្កាត់បទល្មើសព្រៃឈើក្នុងតំបន់ដែនជម្រកសត្វព្រៃភ្នំឱរ៉ាល់ នោះទេ។
ប្រជាពលរដ្ឋក្នុងឃុំឈើតុំ ស្រុកក្រគរ បានអំពាវនាវឲ្យថ្នាក់ដឹកនាំគណៈកម្មការជាតិដើម្បីទប់ស្កាត់និងបង្ក្រាបបទល្មើសធនធានធម្មជាតិ ចាត់វិធានការបង្ក្រាបឈ្មួញឈ្មោះ កោះ សំភី ហៅតាហយ ដែលកំពុងបំផ្លាញព្រៃឈើនៅតំបន់ដែនជម្រកសត្វព្រៃភ្នំឱរ៉ាល់ និងតំបន់ជួរភ្នំក្រវាញ យ៉ាងមហន្តរាយ។
ដោយហេតុថា ឈ្មួញឈ្មោះ កោះ សំភី ហៅតាហយ ជាមន្ត្រីយោធាពាក់ផ្កាយលើស្មា ហើយមន្ត្រីជំនាញនិងសមត្ថកិច្ចពាក់ព័ន្ធក្នុងខេត្តពោធិ៍សាត់ មិនហ៊ានក្អកជាមួយឈ្មួញម្នាក់នេះទេ។
ជាក់ស្តែងបច្ចុប្បន្នឈ្មួញឈ្មោះ កោះ សំភី ហៅតាហយ កាប់ឈើដឹកជញ្ជូនឈើចេញពីព្រៃក្នុងស្រុកភ្នំក្រវាញ យ៉ាងពេញបន្ទុកហើយមន្ត្រីអាជ្ញាធរ មន្ត្រីជំនាញនិងសមត្ថកិច្ចក្នុងខេត្តពោធិ៍សាត់ សម្ងំស្ងាត់ឈឹង។
