ប្រភពពីក្រុមឈ្មួញនិងអាជីវករដឹកជញ្ជូនស្រូវទៅលក់ឲ្យឈ្មួញយួនតាមច្រកភ្នំដិន បានឲ្យដឹងទៀតថា កន្លងមកពេលពួកគាត់ដឹកស្រូវទៅលក់ឲ្យឈ្មួញយួនគឺគ្មានសមត្ថកិច្ចនគរបាលគាបយកលុយក្នុង១រថយន្ត១៥០០០រៀល ដូចសព្វថ្ងៃនេះទេ។
ឥឡូវស្រាប់តែសមត្ថកិច្ចនគរបាលច្រកភ្នំដិន តម្រូវឲ្យពួកគាត់បង់លុយតាមការកំណត់ ហើយអ្នកដឹកស្រូវដែលគ្មានខ្សែជាមន្ត្រីគនរបាលនៅច្រកភ្នំដិន គឺបានឆ្លងដែនទៅស្រុកយួនក្រោយគេ។
ប្រការនេះហើយទើបឈ្មួញនិងអាជីវករបានលាតត្រដាងរឿងអាស្រូវរបស់សមត្ថកិច្ចនគរបាលនៅច្រកភ្នំដិន ជាសាធារណៈ ដើម្បីឲ្យអាជ្ញាធរខេត្តតាកែវ និងថ្នាក់ដឹកនាំក្រសួងពាក់ព័ន្ធបានជ្រួតជ្រាបជុំវិញរឿងនេះ។
ប្រភពពីក្រុមឈ្មួញ ក្រុមអាជីវករនាំចូលទំនិញពីស្រុកយួនតាមច្រកទ្វារអន្តរជាតិភ្នំដិន ស្រុកគិរីវង់ ខេត្តតាកែវ បានឲ្យដឹងថា សមត្ថកិច្ចនគរបាលប្រចាំច្រកនេះរាប់ក្បាលរថយន្តដឹកទំនិញរបស់ពួកគេ ហើយគាបយកលុយតាមអំពើចិត្ត។
ដូច្នេះហើយទើបមានសេចក្តីអំពាវនាវឲ្យលោក អ៊ួច ភា អភិបាលខេត្តតាកែវ ក៏ដូចជាថ្នាក់ដឹកនាំក្រសួងនិងស្ថាប័នពាក់ព័ន្ធពិនិត្យឡើងវិញខ្លះផងដើម្បីកុំឲ្យសមត្ថកិច្ចនគរបាលនៃច្រកភ្នំដិនធ្វើអ្វីៗ តាមអំពើចិត្តទៀត។ ក្រុមឈ្មួញនិងក្រុមអាជីវករបានឲ្យដឹងទៀតថា សូម្បីតែអ្នកដឹកជញ្ជូនស្រូវទៅលក់ឲ្យឈ្មួញយួនតាមច្រកភ្នំដិន ក៏ត្រូវសមត្ថកិច្ចនគរបាលគាបយកលុយដែរ។
តាមការបញ្ជាក់ពីក្រុមឈ្មួញនិងអាជីវករបានឲ្យដឹងទៀតថា សម្រាប់ទំនិញនាំចូលពីស្រុកយួនតាមច្រកភ្នំដិន ត្រូវបង់លុយឲ្យសមត្ថកិច្ចនគរបាលប្រចាំច្រកនេះក្នុង១រថយន្ត១៥០០០រៀល ដោយគេអះអាងថា ជាលុយបង់ថ្លៃចំណត។
ចំណែកអ្នកដឹកជញ្ជូនស្រូវទៅលក់ឲ្យឈ្មួញយួនតាមច្រកភ្នំដិន ក៏ត្រូវបង់លុយឲ្យសមត្ថកិច្ចនគរបាលក្នុង១រថយន្ត១៥០០០រៀល ផងដែរដោយមិនអាចតវ៉ាបានឡើយ។ ហេតុនេះលោក អ៊ួច ភា អភិបាលខេត្តតាកែវ និងថ្នាក់ដឹកនាំក្រសួងស្ថាប័នពាក់ព័ន្ធមិនគួរបណ្តែតបណ្តោយតទៅទៀតឡើយព្រោះសមត្ថកិច្ចនគរបាលប្រចាំច្រកទ្វារភ្នំដិន កំពុងប្រព្រឹត្តអំពើពុករលួយយ៉ាងរលូន។
