មណ្ឌលគីរី ÷ កាលពីពេល ថ្មីៗ នេះនៅថ្ងៃទី២៥,ខែមិនា,ឆ្នាំ២០២១ ក្រុមសារព័ត៌មាន ក្នុងស្រុក បានចុះផ្តិត យករូបភាព រថយន្តម៉ាកធុនដ្រា ជាច្រើនគ្រឿង របស់មេឈ្មួញឈ្មោះរិទ្ធ សម្រុកដឹកជញ្ជូនឈើប្រណិត ចេញពីចំណុច ដេអេ ឃុំពូជ្រៃ ស្រុកពេជ្រាដា យកទៅលក់ ស្រុកយួនតាម ច្រកដាក់ដាំ ជារៀងរាល់យប់ថ្ងៃ រីឯស្ថាប័នពាក់ព័ន្ធក្នុងខេត្តមិនចាត់វិធានការបង្ក្រាប បទល្មេីសព្រៃឈើ បែរជា រក្សាភាពស្ងៀមស្ងាត់ ដូចត្រូវថ្នាំសណ្តំទៅវិញ។
បើតាមប្រភពពី មន្ត្រីពាក់ព័ន្ធនៅច្រកទ្វេភាគីដាក់ដាំ បានឲ្យដឹងថា លោក យូ សុធា នាយប៉ុស្តិ៍នគរបាល អន្តោប្រវេសន៍ ច្រកទ្វេភាគីដាក់ដាំ មានសិទ្ធិអំណាចធំជាងគេក្នុងការបើកបារ៉ាស់ឲ្យឈ្មួញឈ្មោះរិទ្ធ ដឹកជញ្ជូនឈើចេញទៅស្រុកយួន បានយ៉ាង រលូន។
ប្រភពពីមន្ត្រីអង្គការក្រៅរដ្ឋាភិបាលដែលឃ្លាំមើលបទល្មើសព្រៃឈើក្នុងខេត្តមណ្ឌលគិរី បានឲ្យដឹងទៀតថា រយៈពេលប្រមាណ១សប្តាហ៍កន្លងទៅនេះ ឈ្មោះ រិទ្ធ ប្រើប្រាស់រថយន្តម៉ាក់ធុនដ្រា ជាច្រើនគ្រឿងដឹកជញ្ជូនឈើប្រណីត ប្រភេទឈើលេខ១ ចេញទៅលក់ស្រុកយួនតាមច្រកព្រំដែនទ្វេភាគីដាក់ដាំ ស្រុកអូររាំង យ៉ាងពេញបន្ទុក។
ប្រភពស្និទ្ធនឹងលោក យូ សុធា នាយប៉ុស្តិ៍នគរបាលអន្តោប្រវេសន៍ ច្រកទ្វេភាគីដាក់ដាំ បានឲ្យដឹងថា ការដែលលោក យូ សុធា ហ៊ានធ្វើអ្វីៗតាមអំពើចិត្ត គឺដោយសារអាងមានលោកឧត្តមសេនីយ៍ទោ ឡោ សុខា ស្នងការដ្ឋាននគរបាលខេត្តមណ្ឌលគិរី ជាបង្អែកដ៏រឹងមាំ។
ចំណែកលោក ស្វាយ សំអ៊ាង អភិបាលខេត្តមណ្ឌលគិរី នឹងលោក ហែម បូណារ៉ែល មេបញ្ជាការកងរាជអាវុធហត្ថ ខេត្តមណ្ឌលគិរី មិនចាត់វិធានការបង្ក្រាប ករណីឈ្មួញដឹកជញ្ជូនឈើខុសច្បាប់ចេញទៅស្រុកយួនតាមច្រកដាក់ដាំ យ៉ាងរលូននោះទេ។
ហេតុនេះទើបមាន សេចក្តីអំពាវនាវឲ្យនាយឧត្តមសេនីយ៍ សៅ សុខា មេប៉េអឹមកងរាជអាវុធលេីផ្ទៃប្រទេស នឹងថ្នាក់ដឹកនាំគណៈកម្មាធិការថ្នាក់ជាតិដើម្បីទប់ស្កាត់ នឹងបង្ក្រាបបទល្មើសធនធានធម្មជាតិ ចាត់វិធានការបង្ក្រាបក្រុមឈ្មួញដឹកជញ្ជូនឈើចេញទៅស្រុកយួនតាមច្រកដាក់ដាំ ផងទាន។
តាមប្រភពពី សមត្ថកិច្ចពាក់ព័ន្ធ បានឲ្យដឹងថា ក្នុងមួយយប់ៗ មេឈ្មួញឈើឈ្មោះ រិទ្ធ ប្រើប្រាស់រថយន្តម៉ាកធុនដ្រា ជាច្រើនគ្រឿង មាន ផ្លាកលេខរថយន្ត ដូចៗគ្នាងាយស្រួល ចំណាំរថយន្ត ក្រុមឈ្មញ ដឹកជញ្ជូនឈើរាប់សិបម៉ែត្រគូបយកទៅស្រុកយួន តាមច្រកដាក់ដាំ យ៉ាងរលូនតែម្តង។
ប្រការនេះហើយ ធ្វើឲ្យព្រៃឈើដែលនៅសេសសល់បន្តិចបន្ទួច ក្នុងស្រុកកែវសីមា ស្រុកកោះញ៉ែកនិងស្រុកពេជ្រាដាកំពុងប្រឈមសេចក្តីវិនាសព្រោះឈ្មួញឈ្មោះ រិទ្ធ និងឈ្មួញដទៃទៀតនៅតែអាចដឹកជញ្ជូនឈើចេញទៅស្រុកយួនតាមច្រកដាក់ដាំងាយស្រួលបំផុត។
បញ្ហាដែលគួរឲ្យកត់សម្គាល់នោះគឺលោក ស្វាយ សំអ៊ាង អភិបាលខេត្តមណ្ឌលគិរី នឹងលោក ហែម បូណារ៉ែល មេបញ្ជាការកងរាជអាវុធហត្ថខេត្តមណ្ឌលគិរី មិនចាត់វិធានការបង្ក្រាបក្រុមឈ្មួញដែលប្រព្រឹត្តបទល្មើសព្រៃឈើនោះទេ ថ្ងៃអនាគតឮពិតជាវិនាសហិនហោច ក្រោមស្នាដៃរបស់ឈ្មួញ៕
