ប្រភពស្និទ្ធនឹងលោក ឈួន ហៃ ប្រធានសាខាគយខេត្តកំពង់ស្ពឺ បានឲ្យ ដឹងថា ចាប់តាំងពីថ្ងៃទី១១ ខែមីនា ឆ្នាំ២០១៩ ដែលលោក ឈួន ហៃ ទទួលបានតំណែងជាប្រធានសាខាគយខេត្តកំពង់ស្ពឺ គឺលោក ឈួន ហៃ មិនដែលចាត់វិធានការបង្ក្រាប ក្រុមឈ្មួញដឹកជញ្ជូនទំនិញគេចពន្ធ ទំនិញបង់ពន្ធមិនគ្រប់និងទំនិញខុសច្បាប់នោះទេ។
ប្រភពបានឲ្យដឹងទៀតថា ដោយសារលោក ឈួន ហៃ អាងមានខ្នងបង្អែករឹងមាំនៅក្នុងអគ្គនាយកដ្ឋានគយនិងរដ្ឋាករកម្ពុជា ទើបហ៊ានធ្វើអ្វីៗតាមអំពើចិត្តដោយប្រព្រឹត្តអំពើពុករលួយតាមច្រើនរូបភាព។
ហេតុនេះលោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ មិនគួរមើលរំលងអំពើពុករលួយពេញបន្ទុករបស់លោក ឈួន ហៃ ប្រធានសាខាគយខេត្តកំពង់ស្ពឺ នោះទេ។
តាមប្រភពពីក្រុមឈ្មួញដឹកជញ្ជូនទំនិញឆ្លងកាត់ខេត្តកំពង់ស្ពឺ បានឲ្យដឹងថា ទោះបីពួកគេដឹកជញ្ជូនទំនិញដែលបង់ពន្ធនាំចូលត្រឹមត្រូវក៏ដោយក៏ចៀសមិនផុតពីបង់លុយលើតុក្រោមតុតាមការកំណត់របស់មន្ត្រីគយប្រចាំប៉ុស្តិ៍ត្រួតពិនិត្យនៅខាងមុខស្នាក់ការសាខាគយខេត្តកំពង់ស្ពឺ នោះទេ។
ចំណែកឈ្មួញធំៗដែលដឹកជញ្ជូនទំនិញគេចពន្ធ ទំនិញបង់ពន្ធមិនគ្រប់និងទំនិញខុសច្បាប់ បានក្លាយទៅជាប្រភពចំណូលដ៏សំខាន់របស់លោក ឈួន ហៃ ប្រធានសាខាគយខេត្តកំពង់ស្ពឺ ព្រោះក្រុមឈ្មួញធំៗសុទ្ធតែសុំការយោគយល់ពីលោក ឈួន ហៃ ដើម្បីឲ្យមុខរបររបស់ពួកគេប្រព្រឹត្តទៅដោយរលូន។
ចំណែកលោក គុណ ញឹម អគ្គនាយកគយ បានរក្សាភាពស្ងៀមស្ងាត់បើទោះបីរឿងអាស្រូវពុករលួយរបស់លោក ឈួន ហៃ ប្រធានសាខាគយខេត្តកំពង់ស្ពឺ ត្រូវបានលាតត្រដាងជាបន្តបន្ទាប់យ៉ាងណាក៏ដោយ។
មន្ត្រីគយក្នុងខេត្តកំពង់ស្ពឺ មួយចំនួនបានបង្ហើបឲ្យដឹងថា រយៈពេលជិត២ឆ្នាំមកហើយដែលលោក ឈួន ហៃ ប្រធានសាខាគយខេត្តកំពង់ស្ពឺ ប្រមូលលុយតាមរបៀបពុករលួយដោយគ្មានញញើតអ្វីទាំងអស់ហើយ ប្រើឈ្មោះ លោក គុណ ញឹម អគ្គនាយកគយ ដើម្បីបិទបាំងអំពើពុករលួយរបស់ខ្លួន។
ក្នុងនោះ ប៉ុស្តិ៍ជជុះរបស់មន្ត្រីគយនៅខាងមុខស្នាក់ការសាខាគយខេត្តកំពង់ស្ពឺ បានក្លាយជាប្រភពចំណូលដ៏ធំរបស់លោក ឈួន ហៃ ទាំងយប់ទាំងថ្ងៃព្រោះឈ្មួញដែលដឹកជញ្ជូនទំនិញបង់ពន្ធត្រឹមត្រូវក៏ចៀសមិនផុតពីបង់លុយតាមការកំណត់របស់ក្រុមមន្ត្រីគយ ឈរជើងនៅប៉ុស្តិ៍ជជុះនោះដែរ។
ជាងនេះទៅទៀតប្រភពខ្លះបង្ហើបឲ្យដឹងថា លោក ឈួន ហៃ ប្រធានសាខាគយខេត្តកំពង់ស្ពឺ ខំប្រឹងស្រង់ដើមតាមការគ្រោងទុកព្រោះតំណែងជាមេគយខេត្តកំពង់ស្ពឺ គឺលោក ឈួន ហៃ ចំណាយដើមទុនមិនតិចទេ៕
