ក្រចេះ ÷ តាមសេចក្តីរាយការណ៍ពីប្រជាពលរដ្ឋបានឲ្យដឹងថា មានរថយន្តសាំយ៉ុងកែច្នៃដឹកឈើវែងៗនិងរថយន្តទំនើបៗច្រើនប្រភេទដឹកជញ្ជូនឈើឆ្លងកាត់រង្វង់មូលស្រុកស្នួល តាមផ្លូវជាតិលេខ៧ ចូលទៅស្រុកមេមត់ ខេត្តត្បូងឃ្មុំ ដោយគ្មានការរំខានពីមន្ត្រីរដ្ឋបាលព្រៃឈើនិងសមត្ថកិច្ចពាក់ព័ន្ធនោះទេ។
ប្រ ភពបានបញ្ចាក់ថា ឈ្មួញមួយចំនួនដឹកជញ្ជូនឈើពីចំណុចផ្លូវលេខ១០៧ ឃុំឃ្សឹម ស្រុកស្នួល តាមបណ្តោយផ្លូវលេខ៧៦ រីឯឈ្មួញមួយចំនួនទៀត ដឹកជញ្ជូនឈើចេញពីភូមិសំពោច ស្រែរនាម ចូលទៅស្រុកមេមត់ ខេត្តត្បូងឃ្មុំ យ៉ាងគគ្រឹកគគ្រេង ។
ប្រ ការនេះធ្វើឲ្យបទបញ្ជារបស់លោក សាន្ត ប៊ុនថាន មេបញ្ជាការកងរាជអាវុធហត្ថខេត្តក្រចេះ ក្លាយជារឿងឥតន័យព្រោះបទល្មើសព្រៃឈើកើតឡើងយ៉ាងគំហុកនៅក្នុងស្រុកមេមត់។
ប្រភពព័ត៌មាន ពីប្រជាពលរដ្ឋ ក្នុងឃុំឃ្សឹម ស្រុកស្នួល ខេត្តក្រចេះ បានឲ្យដឹងថា រយៈពេលប៉ុន្មានយប់កន្លងទៅនេះឈ្មួញច្រើននាក់ធ្វើសកម្មភាពដឹកជញ្ជូនឈើឆ្លងកាត់ ស្រុកស្នួលខេត្តក្រចេះ ចូលទៅស្រុកមេមត់ ខេត្តត្បូងឃ្មុំ យ៉ាងពេញបន្ទុក ហើយនៅពេលថ្ងៃក៏មានបទល្មើសព្រៃកើតឡើងដែរ។
មជ្ឈដ្ឋាននាៗសង្ស័យថា មន្ត្រីជំនាញនិងសមត្ថកិច្ចពាក់ព័ន្ធទទួលបានផលប្រយោជន៍ពីក្រុមឈ្មួញដឹកជញ្ជូនឈើខុសច្បាប់ទើបឈ្មួញទាំងនោះអាចដឹកជញ្ជូនឈើពីស្រុកស្នួល ខេត្តក្រចេះ ចូលទៅស្រុកមេមត់ ខេត្តត្បូងឃ្មុំ ទាំងថ្ងៃទាំងយប់។
ប្រភពពីប្រជាពលរដ្ឋក្នុងឃុំឃ្សឹម ស្រុកស្នួល ខេត្តក្រចេះ បានឲ្យ ដឹងទៀតថា ប្រមាណ១សប្ដាហ៍មកហើយដែលឈ្មួញសម្រុកដឹកជញ្ជូនឈើឆ្លងកាត់ស្រុកស្នួល ខេត្តក្រចេះ ចូលទៅស្រុកមេមត់ ខេត្តត្បូងឃ្មុំ យ៉ាងគគ្រឹកគគ្រេងទាំងថ្ងៃទាំងយប់។
បញ្ហានេះលោក វ៉ា ថន អភិបាលខេត្តក្រចេះ និងលោក សាន្ត ប៊ុនថាន មេបញ្ជាការកងរាជអាវុធហត្ថខេត្ត ក្រចេះ មិនគួរបណ្តែតបណ្តោយតទៅទៀតទេ ព្រោះរូបភាពនៃបទល្មើសព្រៃឈើក្នុងស្រុកស្នួល ខេត្តក្រចេះ ជារឿងមិនអាចបិទបាំងបានឡើយ ។
ទន្ទឹមនឹងនេះថ្នាក់ដឹកនាំគណៈកម្មការជាតិ និងបង្ក្រាបបទល្មើសធនធានធម្មជាតិ មិនគួរមើលរំលងករណីបទល្មើសព្រៃឈើ។
