ប្រភពស្និទ្ធនឹងលោក យី ថុល ប្រធានការិយាល័យគយច្រកព្រែកចាក បានឲ្យដឹងថា ការដែលលោក យី ថុលមិនញញើតក្នុងការប្រព្រឹត្តអំពើពុករលួយគឺដោយសា រអាងមានខ្នងបង្អែករឹងមាំនៅក្នុងអគ្គនាយកដ្ឋានគយនិងរដ្ឋាករកម្ពុជា។
ជាក់ស្តែងលោក គុណ ញឹម អគ្គនាយកគយ បានរក្សាភាពស្ងៀមស្ងាត់បើទោះបីរឿងអាស្រូវពុករលួយរបស់លោក យី ថុល ប្រធានការិយាល័យគយច្រកព្រែកចាក ត្រូវបាន លាតត្រដាងជាបន្តបន្ទាប់យ៉ាងណាក៏ដោយ។
ហេតុនេះហើយទើបមានសេចក្តីអំពាវនាវឲ្យលោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ចាត់វិធានការទប់ស្កាត់អំពើពុករលួយរបស់លោក យី ថុល ប្រធានការិយាល័យគយច្រកព្រែកចាក ខ្លះផងព្រោះរឿងអាស្រូវពុករលួយរបស់លោក យី ថុល គឺជារឿងមិនអាចបិទបាំងបានទេ។
ថ្មីៗនេះប្រភពពីមន្ត្រីពាក់ព័ន្ធនៅច្រកទ្វារអន្តរជាតិព្រែកចាក ស្រុកកំពង់ត្រាច ខេត្តកំពត បានឲ្យដឹងថា លោក យី ថុល ប្រធានការិយាល័យគយច្រកព្រែកចាក នៅតែសាងភាពល្បីល្បាញខាងពុករលួយដោយគ្មានញញើតអ្វីទាំងអស់។
ប្រភពបានឲ្យ ដឹងទៀតថា ទំនិញដែលឈ្មួញធំៗនាំចូលតាមច្រកព្រែកចាក បង់ពន្ធត្រឹម៣៥ទៅ៤០ភាគរយប៉ុណ្ណោះ ហើយក្រៅពីនេះឈ្មួញបែងចែកផលប្រយោជន៍ជាមួយលោក យី ថុល ប្រធានការិយាល័យគយច្រកព្រែកចាក យ៉ាងសុខស្រួល។
ទន្ទឹមនឹងនេះសម្រាប់ឈ្មួញនិងអាជីវករតូចតាចព្រមទាំងប្រជាពលរដ្ឋដែលនាំចូលទំនិញពីស្រុកយួនតាមច្រកព្រែកចាក ត្រូវបានលោក យី ថុល និងបក្ខពួកគាបយកលុយលើតុក្រោមតុស្រេចតែអំពើចិត្តរបស់ខ្លួន។
ក្រុមឈ្មួញនិងអាជីវករមួយចំនួនបានរកស៊ីនាំចូលទំនិញតាមច្រកព្រែកចាក ស្រុកកំពង់ត្រាច ខេត្តកំពត បានឲ្យដឹងថា មួយរយៈចុងក្រោយនេះលោក យី ថុល មេគយច្រកព្រែកចាក គាបយកលុយលើតុក្រោមតុពីពួកគេកាន់តែច្រើនឡើងៗ។
ក្រុមឈ្មួញនិងក្រុមអាជីវករបានជំរុញឲ្យលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ បើកការស៊ើបអង្កេតទៅលើរឿងអាស្រូវពុករលួយរបស់លោក យី ថុល ប្រធានការិយាល័យគយច្រកព្រែកចាក ឲ្យបានស៊ីជម្រៅហើយចាត់វិធានការតាមផ្លូវច្បាប់។
ដោយហេតុថា លោក យី ថុល ប្រធានការិយាល័យគយច្រកព្រែកចាក បើកដៃឲ្យឈ្មួញធំៗនាំចូលទំនិញគេចពន្ធ ទំនិញបង់ពន្ធមិនគ្រប់យ៉ាងពេញបន្ទុក ហើយបែរជាគាបសង្កត់ឈ្មួញនិងអាជីវករតូច តាចព្រមទាំងប្រជាពលរដ្ឋ។
