ប្រភពពីមន្ត្រីគយក្នុងខេត្តត្បូងឃ្មុំ បានឲ្យដឹងថា លោក ទន់ ចាន់ធី ប្រធានសាខាគយខេត្តត្បូងឃ្មុំ កំពុងក្លាយទៅជាបង្អែករឹងមាំរបស់លោក យឹម វណ្ណៈ ប្រធានការិយាល័យគយច្រកដា ហើយទុកឲ្យលោក យឹម វណ្ណៈ សាងភាពល្បីល្បាញខាងពុករលួយកាន់តែខ្លាំងជាងមុនទៅទៀត។
ទន្ទឹមនឹងនេះលោក គុណ ញឹម អគ្គនាយកនៃអគ្គនាយកដ្ឋានគយនិងរដ្ឋាករកម្ពុជា តែងរក្សាភាពស្ងៀមស្ងាត់ទុកឲ្យលោក យឹម វណ្ណៈ ប្រធានការិយាល័យគយច្រកដា ប្រព្រឹត្តអំពើពុករលួយយ៉ាងល្បីល្បាញច្រើនឆ្នាំមកហើយ។ ដូច្នេះលោក អូន ព័ន្ធមុនីរ័ត្ន ដែលជារដ្ឋមន្ត្រី្កក្រសួងសេដ្ឋកិច្ចនិងហិរញ្ញវត្ថុ គួរពិនិត្យឡើងវិញជាបន្ទាន់ព្រោះរឿងអាស្រូវពុករលួយច្រើនបែបច្រើនយ៉ាងរបស់លោក យឹម វណ្ណៈ ប្រធានការិយាល័យគយច្រកដា ជារឿងមិនអាចបិទបាំងបានទេ។
ប្រភពពីមន្ត្រីគយនៅក្នុងអង្គភាពសាខាគយខេត្តត្បូងឃ្មុំ មួយចំនួនបានបង្ហើបឲ្យដឹងថា បើទោះបីរឿងអាស្រូវពុករលួយរបស់លោក យឹម វណ្ណៈ ប្រធានការិយាល័យគយច្រកដា ហៅច្រកដូង៧ដើម ស្រុកមេមត់ ខេត្តត្បូងឃ្មុំ ត្រូវបានលាតត្រដាងជាបន្តបន្ទាប់យ៉ាងណាក៏ដោយក៏លោក ទន់ ចាន់ធី ប្រធានសាខាគយខេត្តត្បូងឃ្មុំ ធ្វើមិនដឹងមិនឮអ្វីទាំងអស់។
ប្រការនេះហើយទើបលោក យឹម វណ្ណៈ ប្រធានការិយាល័យគយច្រកដា នៅតែហ៊ានប្រព្រឹត្តអំពើពុករលួយតាមច្រើនរូបភាពដោយគ្មានខ្លាចក្រែងអ្វីទាំងអស់ ជាពិសេសទាក់ទងទៅនឹងការឃុបឃិតឲ្យឈ្មួញធំៗនាំចូលទំនិញគេចពន្ធ ទំនិញបង់ពន្ធមិនគ្រប់និងទំនិញខុសច្បាប់យ៉ាងរលូន។ ប្រភពខ្លះបានលើកឡើងថា លោក យឹម វណ្ណៈ ប្រធានការិយាល័យគយច្រកដា មានខ្នងបង្អែករឹងមាំនៅក្នុងអគ្គនាយកដ្ឋានគយនិងរដ្ឋារករកម្ពុជា ទើបមិនញញើតក្នុងការបន្តប្រព្រឹត្តអំពើពុករលួយយ៉ាងត្រជាក់ចិត្ត។
បើតាមប្រភពពីមន្ត្រីពាក់ព័ន្ធនៅច្រកដា បានឲ្យដឹងថា បច្ចុប្បន្នឈ្មួញឈ្មោះ ចែពិដោរ ឈ្មួញឈ្មោះ ចែដែត និងឈ្មួញជាមន្ត្រីជាន់ខ្ពស់ក្នុងក្រសួងមហាផ្ទៃ ព្រមទាំងឈ្មួញច្រើននាក់ទៀតនៅតែអាចនាំចូលទំនិញគេចពន្ធ ទំនិញបង់ពន្ធមិនគ្រប់និងទំនិញខុសច្បាប់តាមច្រកដា យ៉ាងពេញបន្ទុក។
ទន្ទឹមនឹងនេះក្រុមឈ្មួញដឹកជញ្ជូនឈើចេញទៅស្រុកយួនតាមច្រកដា ហៅច្រកដូង៧ដើម ក៏ជាប្រភពចំណូលរបស់លោក យឹម វណ្ណៈ ប្រធានការិយាល័យគយច្រកដា ដែលល្បីល្បាញខាងប្រព្រឹត្តអំពើពុករលួយផងដែរ។ ប្រភពស្និទ្ធនឹងលោក យឹម វណ្ណៈ ប្រធានការិយាល័យគយច្រកដា បានលើកឡើងថា លោក ទន់ ចាន់ធី ប្រធានសាខាគយខេត្តត្បូងឃ្មុំ ខ្លាចបាត់បង់ផលប្រយោជន៍ផ្ទាល់ខ្លួនទើបបណ្តោយឲ្យលោក យឹម វណ្ណៈ ប្រព្រឹត្តអំពើពុករលួយយ៉ាងពេញទំហឹង។
