ស្វាយរៀង÷ ប្រភពពីមន្ត្រីនៅច្រកព្រំដែនទ្វេភាគីបុសមន បានឲ្យដឹងទៀតថា ឈ្មួញធំៗជាច្រើននាក់នៅតែអាចនាំចូលទំនិញគេចពន្ធ ទំនិញបង់ពនញ្ធមិនគ្រប់ និងទំនិញខុសច្បាប់យ៉ាងពេញបន្ទុកដដែលព្រោះលោក ឃុត សាលីន ប្រធានការិយាល័យគយច្រកបុសមន គិតតែពីរឿងប្រមូលលុយដាក់ហោប៉ៅប៉ុណ្ណោះ។
តាមការបង្ហើបពីមន្ត្រីពាក់ព័ន្ធនៅច្រកទ្វារតំបន់ព្រំដែនបុសមន ស្រុករំដួល ខេត្តស្វាយរៀង បានឲ្យដឹងថា បច្ចុប្បន្នលោក ឃុត សាលីន ប្រធានការិយាល័យគយច្រកបុសមន នៅតែមិនញញើតក្នុងការប្រព្រឹត្តអំពើពុករលួយយ៉ាងពេញទំហឹងដដែល។
ដោយហេតុថា លោក ហេង សំបូរ ដែលទទួលបានតំណែងជាប្រធានសាខាគយខេត្តស្វាយរៀង តាំងពីថ្ងៃទី០៦ ខែកក្កដា ឆ្នាំ២០២០ មិនបានចាត់វិធានការទប់ស្កាត់អំពើពុករលួយរបស់លោក ឃុត សាលីន ប្រធានការិយាល័យគយច្រកបុសមន នៅឡើយទេ។
ផ្ទុយទៅវិញលោក ហេង សំបូរ ប្រធានសាខាគយខេត្តស្វាយរៀង នៅតែបណ្តោយឲ្យលោក ឃុត សាលីន សាងភាពល្បីល្បាញខាងពុករលួយស្រេចតែអំពើចិត្តដដែល ហើយមិនខ្វល់ពីការរិះគន់អ្វីទាំងអស់។
ចំណែកប្រជាពលរដ្ឋនិងអាជីវករតូចតាចដែលនាំចូលទំនិញពីស្រុកយួនតាមច្រកបុសមន ត្រូវលោក ឃុត សាលីន និងបក្ខពួកគាបយកលុយតាមអំពើចិត្តដោយម៉ូតូដឹកទំនិញ១គ្រឿងត្រូវបង់លុយ១ម៉ឺនរៀល រ៉ឺម៉ក១គ្រឿងត្រូវបង់លុយ៤ម៉ឺនរៀលទៅ៨ម៉ឺនរៀល ហើយត្រាក់ទ័រដឹកទំនិញ១គ្រឿងត្រូវបង់លុយ១០ម៉ឺនរៀល។ ប្រភពបានឲ្យដឹងទៀតថា ក្រុមមនុស្សរបស់លោក ឃុត សាលីន ប្រធានការិយាល័យគយច្រកបុសមន ដែលប្រចាំការនៅមុខស្នាក់ការការិយាល័យគយច្រកបុសមន ប្រមូលលុយបានយ៉ាងច្រើនសន្ធឹកសន្ធាប់ជារៀងរាល់ថ្ងៃ។
មន្ត្រីគយនៅក្នុងអង្គភាពសាខគយខេត្តស្វាយរៀង បានបង្ហើបឲ្យដឹងថា រហូតមកដល់ពេល នេះលោក ហេង សំបូរ ប្រធានសាខាគយខេត្តស្វាយរៀង នៅតែបណ្តោយឲ្យលោក ឃុត សាលីន ប្រធានការិយាល័យគយច្រកបុសមន ប្រព្រឹត្តអំពើពុករលួយយ៉ាងពេញទំហឹងដដែល។
ដូច្នេះលោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ គួរពិនិត្យឡើងវិញខ្លះផងព្រោះលោក គុណ ញឹម អគ្គនាយកនៃអគ្គនាយកដ្ឋានគយនិងរដ្ឋាករកម្ពុជា កំពុងបណ្តោយឲ្យលោក ហេង សំបូរ ប្រធានសាខាគយខេត្តស្វាយរៀង និងលោក ឃុត សាលីន ប្រធានការិយាល័យគយច្រកបុសមន ប្រព្រឹត្តអំពើពុករលួយយ៉ាងសុខស្រួល។
ប្រភពស្និទ្ធនឹងលោក ហេង សំបូរ ប្រធានសាខាគយខេត្តស្វាយរៀង បានលើកឡើងថា លោក ហេង សំបូរ កំពុងយកជំនាញនៃអំពើពុករលួយកាលនៅធ្វើជាមេគយខេត្តកំពត មកអនុវត្តន៍ក្នុងខេត្តស្វាយរៀង យ៉ាងសុខស្រួលគ្មានញញើតអ្វីឡើយ។
