ប្រភពពីមន្ត្រីគយមួយចំនួននៅក្នុងខេត្តមណ្ឌលគិរី បានឲ្យដឹងថា ការដែលលោក ហ៊ុយ សុជាតិ ទទួលបានតំណែងជាមេគយខេត្តមណ្ឌលគិរី គឺដោយសារមានខ្នងបង្អែករឹងមាំនៅក្នុងអគ្គនាយកនាយកដ្ធានគយនិងរដ្ឋាករកម្ពុជា។ ដូច្នេះហើយទើបក្រោយពេលទទួលបានតំណែងជាប្រធានការិយាល័យរដ្ឋបាលនិងគ្រប់គ្រងនៃស្ថាប័នគយនិងរដ្ឋាករខេត្តមណ្ឌលគិរី លោក ហ៊ុយ សុជាតិ ខំប្រឹងប្រព្រឹត្តអំពើពុករលួយប្រមូលលុយស្រង់ដើម។
ជាក់ស្ដែងមួយរយៈចុងក្រោយនេះឈ្មួញនាំចូលទំនិញនិងប្រេងសាំងគេចពន្ធតាមច្រកទ្វេភាគីដាក់ដាំ និងច្រកដទៃទៀតយ៉ាងពេញបន្ទុកព្រោះលោក ហ៊ុយ សុជាតិ គិតតែពីរឿងផលប្រយោជន៍ផ្ទាល់ខ្លួនប៉ុណ្ណោះ។ មន្ត្រីគយក្នុងខេត្តមណ្ឌលគិរី បានឲ្យដឹងថាលោក ហ៊ុយ សុជាតិ តែងប្រើប្រាស់ឈ្មោះមេគយធំៗនៅក្នុងអគ្គនាយកដ្ឋានគយនិងរដ្ឋាករកម្ពុជា ដើម្បីបិទបាំងទង្វើមិនប្រក្រតីនិងរឿងអាស្រូវពុករលួយរបស់ខ្លួន។
ប្រភពពីមន្ត្រីគយនិងភ្នាក់ងារគយក្នុងខេត្តមណ្ឌលគិរី មួយចំនួនបានបង្ហើបឲ្យដឹងថាលោក ហ៊ុយ សុជាតិ អតីតប្រធានការិយាល័យគយច្រកទ្វារអន្តរជាតិប៉ោយប៉ែត ដែលបច្ចុប្បន្នជាប្រធានការិយាល័យរដ្ឋបាល និងគ្រប់គ្រងនៃសាខាគយខេត្តមណ្ឌលគិរី កំពុងប្រព្រឹត្តអំពើពុករលួយយ៉ាងពេញបន្ទុក។ ប្រភពបានឲ្យដឹងទៀតថា ដោយសារចំណាយដើមទុនយ៉ាងច្រើនក្នុងការទទួលបានតំណែងជាមេគយខេត្តមណ្ឌលគិរី ទើបលោក ហ៊ុយ សុជាតិ ខំប្រឹងប្រមូលលុយស្រង់ដើមដោយមិនខ្វល់ពីការរិះគន់អ្វីទាំងអស់។
ដូច្នេះហើយទើបមានសេចក្ដីអំពាវនាវឲ្យលោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ក៏ដូចជាលោក គុណ ញឹម អគ្គនាយកនៃអគ្គនាយកដ្ឋានគយនិងរដ្ឋាករកម្ពុជា ចាត់វិធានការទប់ស្កាត់អំពើពុករលួយរបស់លោក ហ៊ុយ សុជាតិ មេគយខេត្តមណ្ឌលគិរី ខ្លះផង។
ប្រភពជិតស្និទ្ធនឹងលោក ហ៊ុយ សុជាតិ បានឲ្យដឹងថា បច្ចុប្បន្នលោក ហ៊ុយ សុជាតិ កំពុងយកបទពិសោធន៍កាលនៅធ្វើជាប្រធានការិយាល័យគយច្រកទ្វារអន្តរជាតិប៉ោយប៉ែត មកអនុវត្តន៍នៅខេត្តមណ្ឌលគិរី យ៉ាងជំនាញ។ ប្រភពបានឲ្យដឹងទៀតថា ទំនិញដែលឈ្មួញនាំចូលពីស្រុកយួនតាមច្រកទ្វេភាគីដាក់ដាំ និងច្រកផ្សេងទៀតក្នុងខេត្តមណ្ឌលគិរី បង់ពន្ធត្រឹម២៥ទៅ៣០ភាគរយប៉ុណ្ណោះ ហើយឈ្មួញធំៗមួយចំនួននាំចូលប្រេងសាំងគេចពន្ធតាមច្រកទ្វេភាគីដាក់ដាំ យ៉ាងពេញបន្ទុក។
លើសនេះទៅទៀតក្រុមឈ្មួញដែលដឹកជញ្ជូនឈើចេញទៅស្រុកយួនតាមច្រកទ្វេភាគីដាក់ដាំ និងច្រកទ្វេភាគីដទៃទៀតក្នុងខេត្តមណ្ឌលគិរី គឺជាប្រភពចំណូលដ៏សំខាន់របស់លោក ហ៊ុយ សុជាតិ មេគយខេត្តមណ្ឌលគិរី ផងដែរ។
