កំពង់ធំ ÷ ប្រភពពីក្រុមឈ្មួញនិងអាជីវករដឹកជញ្ជូនទំនិញឆ្លងកាត់ផ្លូវជាតិលេខ៦ ស្រុកសន្ទុក ខេត្តកំពង់ធំ បានឲ្យដឹងថា លោក ភន ម៉ៅ ប្រធានសា្ថនីយ៍ជញ្ជីងថ្លឹងរថយន្តផ្លូវជាតិលេខ៦ ស្រុកសន្ទុក កំពុងប្រមូលលុយតាមរបៀបពុករលួយខ្លាំងជាងកាលលោក អ៊ុក រស់ នៅធ្វើជាប្រធានស្ថានីយ៍នេះទៅទៀត។
ក្រុមឈ្មួញនិងក្រុមអាជីវករបានឲ្យដឹងថា ទោះបីពួកគាត់ដឹកជញ្ជូនទំនិញ ដឹកជញ្ជូនកសិផលផ្ទុកមិនលើសទម្ងន់ក៏ដោយ ក៏ត្រូវបង់លុយតាមការកំណត់របស់លោក ភន ម៉ៅ ប្រធានសា្ថនីយ៍ជញ្ជីងថ្លឹងរថយន្តផ្លូវជាតិលេខ៦ ស្រុកសន្ទុក មិនអាចតវ៉ាបានឡើយ។
ចំណែករថយន្តដែលផ្ទុកលើសទម្ងន់វិញត្រូវលោក ភន ម៉ៅ គាបយកលុយតាមអំពើចិត្តដោយប្រើឈ្មោះលោក ជូ កុល្លា ប្រធានមន្ទីរសាធារណការនិងដឹកជញ្ជូនខេត្តកំពង់ធំ ដើម្បីបិទបាំងទង្វើរបស់ខ្លួនទៀតផង។
តាមការបង្ហើបពីមន្ត្រីរាជការនៅក្នុងមន្ទីរសាធារណការនិងដឹកជញ្ជូនខេត្តកំពង់ធំ បានឲ្យដឹងថា ការដែលលោក ភន ម៉ៅ ប្រធានសា្ថនីយ៍ជញ្ជីងថ្លឹងរថយន្តផ្លូវជាតិលេខ៦ ស្រុកសន្ទុក ហ៊ានប្រែក្លាយជញ្ជីងថ្លឹងរថយន្តទៅជាជញ្ជីងថ្លឹងលុយយ៉ាងគឃ្លើនគឺដោយសារអាងមានលោក ជូ កុល្លា ប្រធានមន្ទីរសាធារណការខេត្តកំពង់ធំ ជាបង្អែកដ៏រឹងមាំ។
បញ្ហានេះជារឿងដែលលោក ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន មិនគួរបណ្តែតបណ្តោយឲ្យលោក ជូ កុល្លា ប្រធានមន្ទីរសាធារណការខេត្តកំពង់ធំ និងលោក ភន ម៉ៅ ប្រធានសា្ថនីយ៍ជញ្ជីងថ្លឹងរថយន្តផ្លូវជាតិលេខ៦ ស្រុកសន្ទុក ធ្វើអ្វីៗតាមអំពើចិត្តទៀតឡើយ។
ដោយហេតុថា ចាប់តាំងពីលោក ភន ម៉ៅ ទទួលបានតំណែងជាប្រធានស្ថានីយ៍ជញ្ជីងថ្លឹងរថយន្តផ្លូវជាតិលេខ៦ ស្រុកសន្ទុក ខេត្តកំពង់ធំ គឺលោក ភន ម៉ៅ កំពុងប្រើជំនាញរាប់ក្បាលរថយន្តដឹកកសិផលយកលុយដោយមិនចាំបាច់ថ្លឹងឲ្យបានត្រឹមត្រូវតាមបទដ្ឋានបច្ចេកទេសឡើយ។
ក្រុមឈ្មួញនិងអាជីវករដឹកជញ្ជូនទំនិញ ដឹកជញ្ជូនកសិផលឆ្លងកាត់ផ្លូវជាតិលេខ៦ ស្រុកសន្ទុក ខេត្តកំពង់ធំ បានអំពាវនាវឲ្យលោក សេង ឈួន មេជញ្ជីងថ្លឹងរថយន្តទូទាំងប្រទេស ចាត់វិធានការទប់ស្កាត់អំពើពុករលួយរបស់លោក ភន ម៉ៅ ប្រធានសា្ថនីយ៍ជញ្ជីងថ្លឹងរថយន្តផ្លូវជាតិលេខ៦ ស្រុកសន្ទុក ខ្លះផង។
ដោយហេតុថា លោក ភន ម៉ៅ ប្រធានសា្ថនីយ៍ជញ្ជីងថ្លឹងរថយន្តផ្លូវជាតិលេខ៦ ស្រុកសន្ទុក កំពុងសាងភាពល្បីល្បាញខាងពុករលួយយ៉ាងពេញបន្ទុកដោយគ្មានញញើតអ្វីទាំងអស់ព្រោះមានការឃុបឃិតបើកដៃពីសំណាក់លោក ជូ កុល្លា ប្រធានមន្ទីរសាធារណការនិងដឹកជញ្ជូនខេត្តកំពង់ធំ។
ប្រភពពីមន្ត្រីរាជការក្នុងមន្ទីរសាធារណការខេត្តកំពង់ធំ បានឲ្យដឹងទៀតថា លោក ជូ កុល្លា អាងមានឪពុកក្មេកជាមន្ត្រីជាន់ខ្ពស់នៅក្រសួងការពារជាតិ ទើបមិនញញើតក្នុងការប្រព្រឹត្តអំពើពុករលួយ ហើយសូម្បីតែលោក សុខ លូ អភិបាលខេត្តកំពង់ធំ ក៏លោក ជូ កុល្លា ផ្គើនដាក់ដែរ?៕
